प्रदेशको अस्थायी राजधानीको खाका तयार, आफ्नो क्षेत्रलाई राजधानी बनाउन माग गर्दै ठाँउ ठाँउमा आन्दोलन
काठमाडौं, १९ पुस । सरकारले मुलुकका सातवटै प्रदेशको अस्थायी राजधानीको खाका तयार पारेको छ। जस अन्तर्गत प्रदेश १ को विराटनगर, प्रदेश २ को जनकपुर, प्रदेश ३ को भक्तपुरको ठिमी, प्रदेश ४ को पोखरा, प्रदेश ५ को दाङ, प्रदेश ६ को सुर्खेत र प्रदेश ७ को धनगढीलाई अस्थायी राजधानी तोकिएको छ। प्रधानमन्त्री तथा मन्त्रिपरिषद्को कार्यालय र सहरी विकास मन्त्रालयले स्थलगत अध्ययनपछि ती ठाउँ उपयुक्त भौतिक संरचना, उपलब्ध स्रोत साधनका आधारमा राजधानीको प्रस्ताव सहित खाका तयार पारिएको बताइएको छ ।
मन्त्रालयका सहसचिव राजेन्द्र पौडेलको टोलीले प्रत्येक प्रदेशका सबै ठाउँको स्थलगत अध्ययन गरेको थियो । टोलीको सिफारिका आधारमा तयार गरिएको उक्त खाकालाई स्विकृतीका लागि मन्त्रिपरिषदको बैठकमा पठाइने छ । अस्थायी रुपमा तोकिएका ती मुकाम प्रदेश सरकारले पुनः हेरफेर गर्न सक्नेछ। तर अहिले नै कतिपय स्थानमा भने आफ्नो क्षेत्रलाई राजधानी बनाउनुपर्ने माग सहित आन्दोलन सुरु भइसकेको छ । प्रदश नं १ को राजधानी धनकुटालाई बनाउनुपर्ने माग गर्दै आज बिहान देखि सुरु भएको आन्दोलनका कारण कोसी राजमार्गको धरान–धनकुटा सडकखण्ड बन्द छ ।
त्यस्तै प्रदेश ७ को राजधानी दिपायललाई बनाउनुपर्ने माग गर्दै डोटीबासी आज देखि अनिश्चितकालिन जिल्ला बन्द लगायतका कार्यक्रम घोषणा गरेर संघर्षमा उक्रिएका छन् । प्रदेश नं ५ को पनि राजधानी बुटबल वा दाङ बनाउने भन्ने बारे राजनीतिक नेतृत्वमै तीब्र बिबाद छ । एमालेका धनश्याम भुसाल र विष्णु् पौडेल बुटवललाई राजधानी बनाउनुपर्ने पक्षमा छन् भने एमालेकै नेता शंकर पोखरले र माओवादी केन्द्रका नेता कृष्णबहादुर महरा दाङलाई राजधानी बनाउनुपर्ने लविङ गरिरहेका छन् । यो जस्तै अन्य क्षेत्रमा पनि राजनधानी तोक्ने विषयमा निकै बिबाद छ । जसको कारण धनकुटाबाट सुरु भएको आन्दोलन अन्य क्षेत्रमा पनि फैलने पक्का छ ।
