नाफा घटे पनि स्थायित्वमा नबिल बैंक दृढ

काठमाडाैं, २० कार्तिक । चालु आर्थिक वर्षको पहिलो त्रैमासमा नबिल बैंक लिमिटेडको खुद नाफा घटेको छ। बैंकले सार्वजनिक गरेको अपरिष्कृत वित्तीय विवरणअनुसार गत आर्थिक वर्षको सोही अवधिको तुलनामा खुद नाफा १४.५७ प्रतिशतले घटेर १ अर्ब ७५ करोड ६९ लाख रुपैयाँमा सीमित भएको छ।

गत वर्षको सोही अवधिमा बैंकले २ अर्ब ५ करोड ६५ लाख रुपैयाँ नाफा कमाएको थियो। नाफा घटेपनि बैंकले स्थिर वित्तीय प्रदर्शन कायम राखेको देखिन्छ।

समीक्षा अवधिमा बैंकको खुद ब्याज आम्दानी ५.७७ प्रतिशतले घटेर ३ अर्ब ९० करोड १२ लाख ६० हजार रुपैयाँमा झरेको छ। कुल सञ्चालन आम्दानी पनि १.०३ प्रतिशतले घट्दै ५ अर्ब २७ करोड ४१ लाख रुपैयाँमा पुगेको छ।

यस्तै, सञ्चालन मुनाफा १०.८४ प्रतिशत घटेर २ अर्ब ५७ करोड ९८ लाख ८६ हजार रुपैयाँमा पुगेको छ।
तर, सकारात्मक पक्षमा खुद फि तथा कमिशन आम्दानी ६.२९ प्रतिशतले बढ्दै ७९ करोड ८७ लाख २८ हजार रुपैयाँ पुगेको छ।

बैंकको वितरणयोग्य मुनाफा ५ अर्ब ६३ करोड ५२ लाख रुपैयाँ र वितरणयोग्य प्रतिशेयर आम्दानी (EPS) ३० रुपैयाँ १५ पैसा रहेको छ।

समीक्षा अवधिमा इम्पेयरमेन्ट चार्ज ४५ करोड ७७ लाख रुपैयाँबाट बढेर ६४ करोड ७२ लाख रुपैयाँ पुगेको छ। नाफासँगै बैंकको प्रतिशेयर आम्दानी (EPS) पनि ३ रुपैयाँ ८६ पैसा घट्दै २५ रुपैयाँ ९७ पैसा भएको छ।

त्यस्तै, बैंकको प्रतिशेयर नेटवर्थ २४० रुपैयाँ ७२ पैसा र मूल्य आम्दानी अनुपात (P/E ratio) १९.९७ गुणा रहेको छ।

२७ अर्ब ५ करोड ६९ लाख रुपैयाँ चुक्ता पूँजी रहेको नबिल बैंकको जगेडा कोषमा ३८ अर्ब ७ करोड ५१ लाख रुपैयाँ सञ्चित छ। पहिलो त्रैमासको अन्त्यसम्म बैंकले ५ खर्ब ५६ अर्ब रुपैयाँ निक्षेप संकलन गरी ४ खर्ब २१ अर्ब रुपैयाँ कर्जा परिचालन गरेको छ।