पूर्वउपराष्ट्रपति पुन परिवारमाथि सुन तस्करी अनुसन्धान तीव्र
काठमाडाैं, २७ असाेज । विद्युतीय चुरोट (भेप) मार्फत सुन लुकाएर तस्करी गरिएको चर्चित प्रकरणमा अब पूर्वउपराष्ट्रपति तथा माओवादी केन्द्रका उपाध्यक्ष नन्दबहादुर पुन (पासाङ) र उनका छोराहरू पनि प्रहरी अनुसन्धानको दायरामा आएका छन्।
प्रहरीका अनुसार सो प्रकरणमा पुन परिवारका सदस्यहरू, उनका सचिवालयका अधिकारी र नजिकका व्यक्तिहरूको संलग्नता देखिएपछि अनुसन्धान अघि बढाइएको हो। यसअघि यसै घटनामा माओवादी केन्द्रका अर्का उपाध्यक्ष तथा पूर्वसभामुख कृष्णबहादुर महरा पक्राउ परिसकेका थिए।
पुनका जेठा छोरा जितेन्द्र पुन दुई वर्षअघि हुम्लाबासीको नक्कली कागजात प्रयोग गरी चिनियाँ समूहसँग चार किलो सुनको लेनदेन गरेको आशंकामा मुछिएका थिए। त्यस्तै, कान्छा छोरा दीपेश पुन भने ९ किलो र ६१ किलो सुन तस्करी, सहकारी ठगी र भुटानी शरणार्थी प्रकरणमा समेत संलग्न रहेको प्रहरीको दाबी छ।
दीपेश हाल फरार छन् भने पुनका सचिवालय सदस्य जीवनकुमार गुरुङ र आफन्त अमला रोका यसअघि नै सुन काण्डमा पक्राउ परेका थिए।
प्रहरी स्रोतका अनुसार पुन परिवारको चिनियाँ समूहसँग घनिष्ठ सम्बन्ध रहेको र सोही नेटवर्कमार्फत सुन तस्करीको जालो सक्रिय भएको आशंका गरिएको छ। यसबारे थप प्रमाण संकलन र संलग्न व्यक्तिहरूको भूमिका स्पष्ट गर्न अनुसन्धान तीव्र पारिएको प्रहरीले जनाएको छ।
