सिंहदरवारमा प्रदर्शनकारीको आगो : १ हजार ४२ सवारी साधान जले
काठमाडाैं, ३१ भदाै । गत भदौ २३ र २४ गते भएको जेन–जी आन्दोलनका क्रममा सिंहदरवार र वरिपरिका सरकारी निकायमा ठूलो संख्यामा सवारी साधान जलेर नष्ट भएका छन्। प्रारम्भिक तथ्याङ्क अनुसार आन्दोलनका क्रममा कुल १ हजार ४२ वटा सवारी साधान जलाइएको पुष्टि भएको छ।
तथ्याङ्क अनुसार, ४४१ वटा साना गाडी र बस जलेका छन् भने ६०१ वटा मोटरसाइकल तथा स्कुटर जलेको देखिएको छ। सबैभन्दा बढी क्षति प्रधानमन्त्री तथा मन्त्रिपरिषद्को कार्यालयमा भएको छ। यस कार्यालयमा ४७ वटा साना गाडी र बस तथा ७४ वटा मोटरसाइकल/स्कुटर जलेका छन्।
अर्थ मन्त्रालयमा ३६ वटा गाडी र ५४ वटा दुईपांग्रे जलेका छन्। गृह मन्त्रालयमा २५ वटा गाडी र ३० वटा दुईपांग्रे, शिक्षा, विज्ञान तथा प्रविधि मन्त्रालयमा २६ वटा गाडी र ४७ वटा दुईपांग्रे, युवा तथा खेलकुद मन्त्रालयमा १९ वटा गाडी र २३ वटा दुईपांग्रे, संघीय संसदमा १८ वटा गाडी र ३६ वटा दुईपांग्रे जलेका तथ्याङ्क प्राप्त भएको छ।
यस्तै, वन तथा वातावरण मन्त्रालयका १७ वटा, कृषि तथा पशुपन्छी विकास मन्त्रालयका ९ वटा गाडी जलेका छन्। संघीय मामिला तथा सामान्य प्रशासन मन्त्रालयमा ३३ वटा साना गाडी, २ ठूला बस र ३६ वटा दुईपांग्रे जलेको छ।
सर्वोच्च अदालतमा ५१ वटा गाडी जलेको पुष्टि भएको छ भने बाइक/स्कुटर संख्या गन्न नसकिने अवस्थामा रहेको छ। स्वास्थ्य तथा जनसंख्या मन्त्रालयमा २२ वटा गाडी र १४ वटा दुईपांग्रे जलेका छन्।
सहरी विकास तथा भवन विकास विभागमा ५० वटा गाडी र अनुमानित २०० वटा दुईपांग्रे, सडक विभागमा ६५ वटा गाडी जलेको छ। महान्याधिवक्ताको कार्यालयमा २ साना गाडी र १ बस जलेका छन्।
काठमाडौं उपत्यका ट्राफिक प्रहरी कार्यालय, बग्गीखानामा १८ वटा गाडी र २९ वटा दुईपांग्रे, र राष्ट्रिय प्राकृतिक स्रोत तथा वित्त आयोगमा ९ वटा बाइक/स्कुटर जलेको प्रारम्भिक तथ्याङ्क छ।
