मुस्ताङको बगैंचामा फस्टायो स्याउ, एक अर्बभन्दा बढीको उत्पादन
काठमाडाैं, २९ असाेज । यस वर्ष मुस्ताङमा स्याउ उत्पादन गत वर्षको तुलनामा उल्लेख्य रूपमा बढेको छ। कृषि ज्ञान केन्द्र मुस्ताङका अनुसार, चालु वर्ष एक अर्ब १० करोड रुपैयाँ बराबरको ७,६३६ मेट्रिकटन स्याउ उत्पादन भएको छ।
गत वर्ष सोही जिल्लामा ९१ करोड ८६ लाख रुपैयाँ बराबरको ७,२३८ मेट्रिकटन स्याउ मात्र उत्पादन भएको थियो। यस वर्ष करिब ४०० मेट्रिकटन बढी स्याउ उत्पादन भएपछि आम्दानी पनि करिब १८ करोड रुपैयाँले बढेको केन्द्रले जनाएको छ।
कृषि ज्ञान केन्द्रका प्रमुख राजेश गुरुङका अनुसार, उत्पादनको तथ्याङ्क किसानका बगैंचाको प्रत्यक्ष अनुगमन, क्रप कटिङ र स्थानीय तहका कृषि शाखाबाट संकलित विवरणका आधारमा तयार गरिएको हो।
गुरुङका अनुसार, हालसम्म कुल उत्पादनको ८० प्रतिशत स्याउ जिल्लाबाहिर निकासी भइसकेको छ भने १० प्रतिशत जिल्लामै खपत भएको छ। बाँकी १० प्रतिशत स्याउ हार्भेस्ट हुन अझै बाँकी छ।
जिल्लाबाहिर निकासी भएको ६,१०८ मेट्रिकटन स्याउबाट ८६ करोड १८ लाख रुपैयाँ आम्दानी भएको छ भने जिल्लामै खपत भएको ७६३ मेट्रिकटन स्याउबाट ११ करोड दुई लाख रुपैयाँ बराबरको आम्दानी भएको केन्द्रले जनाएको छ। बाँकी ७६३ मेट्रिकटन स्याउ अझै संकलन हुन बाँकी छ।
मुस्ताङमा हाल ८३२ हेक्टरमा स्थानीय जातका स्याउ र ६० हेक्टरमा उच्च घनत्वका हाइब्रिड स्याउ उत्पादन भइरहेका छन्। यस वर्ष स्थानीय स्याउको उत्पादन ६,०६९ मेट्रिकटन र हाइब्रिड स्याउको उत्पादन १,५६७ मेट्रिकटन रहेको छ।
स्थानीय स्याउको मूल्य प्रतिकेजी रु. १३० र हाइब्रिड स्याउको रु. २०० रहेको छ। यसअनुसार, स्थानीय स्याउबाट ७८ करोड ८९ लाख रुपैयाँ र हाइब्रिड स्याउबाट ३१ करोड ३४ लाख रुपैयाँ बराबरको आम्दानी भएको छ।
उत्पादकत्वका हिसाबले स्थानीय स्याउको प्रतिहेक्टर उत्पादन १०.४१ मेट्रिकटन र हाइब्रिड स्याउको २६.१२ मेट्रिकटन रहेको छ। गत वर्ष स्थानीय स्याउको उत्पादकत्व १०.७४ मेट्रिकटन रहेकोमा यस वर्ष ०.३३ मेट्रिकटन घटेको कृषि ज्ञान केन्द्रले जनाएको छ।
