एनआरएनएको दुई समूहबिच एकता घोषणा, आगामी फेब्रुअरीभित्र महाधिवेशन गर्ने सहमति
काठमाडौं, १४ मंसिर । लामो समयदेखि विभाजित गैरआवासीय नेपाली संघ (एनआरएनए)काे दुई समूहबिच औपचारिक एकता भएको छ। प्रधानमन्त्री सुशीला कार्कीको उपस्थितिमा डा. बद्री केसी र महेश श्रेष्ठ नेतृत्वका दुई समूहबीच एकता सम्बन्धी सहमति पत्रमा हस्ताक्षर भएको हो।
दुई समूहबिच आगामी फेब्रुअरीभित्र १२ औँ महाधिवेशन सम्पन्न गर्ने सहमति भएकाे छ । त्यसका लागि ११ सदस्यीय स्टेरिङ कमिटी गठन गर्ने, निर्वाचन तथा अनुगमन समितिहरू बनाउने निर्णय पनि गरिएको छ।
महाधिवेशनसम्म डा. बद्री केसी र महेश श्रेष्ठको संयुक्त नेतृत्व रहनेछ। दुवै पक्षका अघिल्ला कार्यसमितिहरूका अभिलेख सुरक्षित राखिने र १२ औँ महाधिवेशनमा सहमतिमै नयाँ नेतृत्व चयन गर्ने प्रयास गरिने सहमतिकाे दस्तावेजमा उल्लेख छ।
पछिल्ला वर्षहरूमा एनआरएनए श्रेष्ठ र केसी समूहमा विभाजित हुँदै आएको थियो। देशको बदलिँदो राजनीतिक परिवेश र संगठनभित्रको लामो विवादका बीच दुवै पक्ष १० बुँदे सहमति गर्दै एकतामा आउन तयार भएका हुन्।
एनआरएनएमा २०७८ सालदेखि सुरु भएको विवादको जरो भने १० औँ महाधिवेशनसँग जोडिएको छ। सो महाधिवेशन विधिसम्मत नभएको भन्दै पूर्वअध्यक्ष शेष घले सर्वोच्च अदालत पुगेपछि अदालतले घलेको नेतृत्वमा १३ सदस्यीय उच्चस्तरीय समिति गठन गरी एकीकृत महाधिवेशन गर्ने जिम्मेवारी दिएको थियो।
तर त्यतिन्जेल ११ औँ महाधिवेशनबाट बद्री केसी अध्यक्षमा निर्वाचित भइसकेका थिए।
