दैनिक उठाउँने राजस्वले दैनिक खर्च धान्ने स्थिति छैन्ः अर्थमन्त्री खतिवडा
काठमाडौं, ३२ जेठ । अर्थमन्त्री डा. युवराज खतिवडाले मुलुकमा दैनिक उठाउँने राजस्वले दैनिक खर्च धान्ने स्थिति नरहेको बताएका छन् । आइतबार प्रतिनिधि सभाको बैठकमा मन्त्री खतिवडाले राजस्वको स्थिति अफ्ठ्यारो रहेको स्वीकारेका हुन् । ‘राजस्वको स्थिति अफ्ठ्यारो छ ।’ उनले भने, ‘यसलाई स्वीकार्न हामीले नै सार्वजनिक गरेको तथ्यांक हो । तथ्यांक तिनै हुन् ।’ सरकारले सार्वजनिक गरेको तथ्यांक नै बास्तविकता भएको उनको भनाई छ ।
त्यस्तै दैनिक उठ्ने राजस्वले सरकारको दैनिक खर्च धान्न नसक्ने मन्त्री खतिवडाले बताए । उनले भने, ‘हामीले दैनिक जति राजस्व उठाउँछौं, त्यो राजस्वले हाम्रो दैनिक खर्च धान्ने स्थिति छैन् ।’ मासिक ४० अर्ब रुपैयाँ अनिवार्य दायित्वमा खर्च हुने गरेको मन्त्री खतिवडाले बताए । मासिक रुपमा भन्सारबाट १५ अर्ब रुपैयाँ मात्र उठ्ने र केही अर्ब रुपैयाँ आन्तिरिक राजस्वबाट उठ्ने गरेकोले चालु खर्चको अनिवार्य दायित्वलाई पुरा गर्न थप प्रयास गर्नुपर्ने आवश्यकता रहेको उनको भनाई छ ।
ती प्रयासहरु भनेका सरकारका कतिपय कोषहरुबाट नै गर्नुपर्ने देखिएको उनले बताए । ‘सरकारकै नीति ड्राइभर्सनबाट र ट्याक्सका हाम्रा दरबन्दीहरुका ड्राइभर्सनबाट गएर खडा भएका कोषहरु छन् । त्यसरी सृजना भएका रोयल्टीहरु छन् ।’ मन्त्री खतिवडाले भने, ‘त्यस्ता रोयल्टीहरु पनि हामीले अहिले कानुनसम्मत ढङ्गले राजस्वमा दाखिला गर्ने कुरा गरेका छौं ।’
