सरकारलाई पाँच पूर्व अर्थमन्त्रीको सुझाव– ‘अन्तरिम बजेट ल्याएर काम चलाउन’
काठमाडौं, १३ जेठ । पाँच पूर्व अर्थमन्त्रीहरुले सरकारले पूर्ण बजेट ल्याउन नहुने बताएका छन् । पूर्व अर्थमन्त्रीहरूको समूह पूर्व अर्थमन्त्री मञ्चले आज विज्ञप्ति जारी गर्दै हाल बहुमतको सरकार नभई कामचलाउ सरकार रहेको र संसद् पुनर्स्थापनाको मुद्दा सर्वोच्च अदालतमा विचाराधीन अवस्थामा रहेकाले पूर्ण बजेट ल्याउन नमिल्ने बताएका हुन ।
पूर्वअर्थमन्त्रीहरु डा. प्रकाशचन्द्र लोहनी, डा. रामशरण महत, कृष्णबहादुर महरा, सुरेन्द्र पाण्डे र वर्षमान पुनले अन्तरिम बजेट ल्याएर काम चलाउन सरकारलाई सुझाव दिएका छन् ।
यस्तै मञ्चले आगामी आर्थिक बजेट कोरोनाले अर्थतन्त्रमा पारेको प्रभावका विषयमा केन्द्रित हुनुपर्ने बताएको छ। बजेटले कोरोनाविरुद्धको खोपको उपलब्धतालाई पहिलो प्राथमिकता दिनुपर्ने उनीहरूले बताएका छन् । स्वास्थ्य पूर्वाधार निर्माण, स्वास्थ्य सामग्रीको उपलब्धता एवं स्वास्थ्यकर्मीहरुको सुरक्षा र सुविधालाई बजेटले विशेष ध्यान दिनुपर्ने सुझाव मञ्चले दिएको छ ।
