नेप्से साढे १८ अंकले बढ्यो, बढेको बजारमा हाइड्रो समूहका लगानीकर्ताले कमाए
काठमाडौं, ९ असोज । धितोपत्र दोस्रो बजार मापक नेप्से परिसूचक मंगलबार १८.४५ अंकले वृद्धि भएर बन्द भएको छ । यस दिन नेप्से ०.९२ प्रतिशतले बढेर २०२२.९१ विन्दुमा बन्द भएको हो । सोमबार भने नेप्से ५.८९ अंकले घटेको थियो ।
आज नेप्सेसँगै कारोबार रकममा पनि वृद्धि भएको छ । सोमबारको तुलनामा कारोबार रकम ५२ करोड ८२ लाख रुपैयाँले बढेको छ । सोमबार एक अर्ब ५६ करोड रुपैयाँको शेयर कारोबार भएको थियो भने आज दुई अर्ब नौ करोड रुपैयाँको शेयर कारोबार भएको छ ।
कारोबारमा आएका १३ वटा समूहगत परिसूचकमध्ये होटल तथा पर्यटन समूहको परिसूचक घटेको छ । यो समूहको परिसूचक ०.१८ अंकले घटेको हो । बाँकी सबै समूहको परिसूचक वृद्धि भएको छ । सर्वाधिक परिसूचक वृद्धि हुनेमा हाइड्रोपावर समूह रहेको छ । परिसूचक बढेको आधारमा यो समूहका लागानीकर्ताले सर्वाधिक कमाएका छन् ।
आज मेन्छिम हाइड्रोपावर लिमिटेड र मनकामना इन्जिनियरिङ हाइड्रोपावरको शेयर मूल्य १० प्रतिशतले वृद्धि भएको छ । सर्वाधिक शेयर कारोबार हुनेमा एनआईसी एशिया बैंक लिमिटेड रहेको छ । यो बैंकको आठ करोड ३४ लाख रुपैयाँको शेयर खरिद विक्री भएको छ ।
आज २८६ धितोपत्रको ८७ लाख चार हजार ४७७ कित्ता खरिद विक्री भएको नेपाल स्टक एक्सचेन्ज (नेप्से)ले जनाएको छ ।
