राष्ट्र बैंकको गभर्नर बन्न राजीनामा दिएका डा. भट्टलाई झड्का, सर्वोच्चमा रिट दर्ता
काठमाडौं, ५ बैशाख । नेपाल राष्ट्र बैंकको गभर्नर बन्न कार्यकारी निर्देशक पदबाट राजीनामा दिएका डा. गुणाकर भट्टविरुद्ध सर्वोच्च अदालतमा रिट निवेदन दर्ता भएको छ ।
भट्टलाई गभर्नर नियुक्तिका लागि योग्यता नपुगेको भन्दै अधिवक्ताद्वय प्रतिभा उप्रेती र विशाल थापाले शुक्रबार सर्वोच्च प्रशासनमा निवेदन दर्ता गराएका हुन् । मुद्धाको पेसी आइतबार तोकिएको छ ।
राष्ट्र बैंकको गभर्नर बन्ने चर्चाका बीच भट्टले शुक्रबार मात्रै राजीनामा बुझाएका हुन् । उनको राजीनामा भने स्वीकृत भइसकेको छैन ।
भट्टलाई गभर्नर बनाउन सत्ता गठबन्धनका प्रमुख दल नेकपा एमालेका अध्यक्ष एवं प्रधानमन्त्री केपी शर्मा ओली र नेपाली कांग्रेसका सभापति शेरबहादुर देउवाबीच सहमति भइसकेको पनि चर्चा चलेको थियो ।
यद्यपि, गभर्नर नियुक्तिका लागि अर्थमन्त्री विष्णु पौडेलको नेतृत्वमा सिफारिस समिति गठन भएको छ । उक्त समितिले नाम मन्त्रिपरिषद्मा पेस गरेपछि मात्रै औपचारिक निर्णय हुनेछ।
