जनसंख्याभन्दा दोब्बर बैंक खाता, निक्षेप वृद्धि तर कर्जा विस्तार सुस्त
काठमाडाैं, २ भदाै । नेपालमा बैंकिङ्ग पहुँच अभूतपूर्व रूपमा विस्तार भएको छ। नेपाल राष्ट्र बैंकले चालु आर्थिक वर्ष २०८२/८३ को साउन महिनासम्मको तथ्याङ्क सार्वजनिक गर्दा देशभर संचालनमा रहेका निक्षेप तथा कर्जा खाता संख्या झन्डै ६ करोड २१ लाख २७ हजार ६८० पुगेको देखिएको छ। यो अघिल्लो वर्षको साउनको तुलनामा ६.८३ प्रतिशत वृद्धि हो।
राष्ट्रिय तथ्याङ्क विभागको जनगणना २०७८ अनुसार नेपालमा हाल कुल जनसंख्या २ करोड ९१ लाख ६५ हजार ५७८ छ। तर देशभर बैंक खाता संख्या ३ करोड २९ लाख ६३ हजार १०२ पुगेको छ, जसले जनसंख्याको २.१३ गुणा बढी बैंक खाता रहेको पुष्टि गर्छ। एक व्यक्तिले धेरै बैंकमा खाता खोल्न पाउने सहज नीतिले यो वृद्धि सम्भव भएको हो।
राष्ट्र बैंकका अनुसार निक्षेप खातामात्र ६ करोड १ लाख ५८ हजार ४३३ पुगेका छन्। अघिल्लो वर्ष साउन मसान्तसम्म यो संख्या ५ करोड ६२ लाख ५५ हजार ३०५ थियो। तीमध्ये वाणिज्य बैंकमा मात्रै ५ करोड १६ लाख १५ हजार ७५९ निक्षेप खाता संचालनमा छन्। विकास बैंकमा ७५ लाख ४३ हजार ३७ र वित्त कम्पनीमा ९ लाख ९९ हजार ६३७ खाता छन्।
कर्जा खाताको संख्या पनि बढेर १९ लाख ३९ हजार २४७ पुगेको छ। अघिल्लो वर्ष यो संख्या १८ लाख ९९ हजार ४८३ थियो। वाणिज्य बैंकमा १६ लाख ६३ हजार ७९१, विकास बैंकमा २ लाख ६६ हजार ८८४ र वित्त कम्पनीमा ५८ हजार ५७२ कर्जा खाता सञ्चालनमा छन्।
देशभर हाल १०७ बैंक तथा वित्तीय संस्था छन्, जसका ११ हजार ८२५ शाखामार्फत वित्तीय सेवा दिइँदैछ। वाणिज्य बैंकका ५,१०१, विकास बैंकका १,१३४, वित्त कम्पनीका २९१ र लघुवित्तका ५,०२ शाखामार्फत सेवा पुर्याइँदै आएको छ।
आर्थिक संकेतका हिसाबले कुल निक्षेप ७२ खर्ब ९४ अर्ब रुपैयाँ पुगेको छ भने कुल कर्जा प्रवाह ५६ खर्ब १८ अर्ब रुपैयाँ मात्र छ। निक्षेपको वृद्धि कर्जा प्रवाहको तुलनामा उच्च देखिएकाले निकट भविष्यमा व्यापारिक लगानी र उत्पादन विस्तारमा केही चुनौती आउन सक्ने अर्थविद्हरूको बुझाइ छ।
