थापाथलीको अटो बजार खरानीमा, दशैंअघि उद्योग संकटमा
काठमाडाैं, २ भदाै । दशैं–तिहारको पूर्वसन्ध्यामा उत्साहले तातेको काठमाडौंको अटो बजार भदौ २४ गतेको ‘जेनजी आन्दोलन’ पछि खरानीमा परिणत भएको छ। राजधानीको प्रमुख अटो हब मानिने थापाथली क्षेत्रमा प्रदर्शन हिंसात्मक भएपछि करिब ३० देखि ५० नयाँ गाडी पूर्णरूपमा जले र करोडौंको लगानी क्षति भएको छ।
साउन अन्तिम र भदौ पहिलो सातासम्म सम्पन्न नेपाल मोबिलिटी एक्स्पो र नाडा अटो शोले नेपाली अटो बजारमा नयाँ उचाइ ल्याएको थियो। यी दुई शोमार्फत वार्षिक बिक्री हुने गाडीमध्ये ४० प्रतिशतभन्दा बढीको बुकिङ भइसकेको थियो। नयाँ मोडेल, कर्जा सहुलियत र विशेष अफरको कारण ग्राहकहरू उत्साहित थिए। तर, आन्दोलनले एकैदिनमा बजारको चमक मेटिदियो।
थापाथलीमा रहेका दर्जनौँ शोरुमहरूमा आगजनी, तोडफोड र लुटपाट भयो। सीजी मोटर्सको १६ युनिट एक्सपेङ, स्मार्ट र एवोन गाडी, टाटाको कम्तीमा १२ गाडी, महिन्द्राको ५ युनिट, सुजुकीको ११ गाडी (जसमा २ पूर्ण जलेका), र अन्य ब्रान्ड सिट्रोन, नेटा, जीकर आदि आंशिक रूपमा क्षतिग्रस्त भए। टाटाका दुई गाडी त चोरीपछि त्रिपुरेश्वर र धापासीमा जलेको अवस्थामा फेला परेका छन्।
हुन्डाई शोरुममा प्रत्यक्ष आगलागी नभए पनि सिसा फुटाइएको र एक गाडीको भित्र आगो लागी सिट तथा सनरुफमा क्षति भएको छ। पोखरा र चितवनका केही शोरुममा पनि आंशिक आगजनी र तोडफोड भएको जानकारी आएको छ।
अहिले अटो व्यवसायीहरू स्थलगत निरीक्षण र क्षति मूल्यांकनमै व्यस्त छन्। पुनर्निर्माण र व्यवसाय पुनः उठाउन समय लाग्ने उनीहरूको भनाइ छ। ग्राहकको भीड घटेका कारण आगामी महिना बिक्रीमा उल्लेख्य गिरावट हुने आशंका उनीहरूले व्यक्त गरेका छन्।
सबैभन्दा ठूलो क्षति चौधरी ग्रुप अन्तर्गतको सीजी मोटर्सलाई भएको छ। आन्दोलनको क्रममा रबिभवनस्थित निजी निवासमा समेत आगजनी हुँदा पार्किङमा रहेका ६ मध्ये २ गाडी पूर्णरूपमा नष्ट भएको छ।
व्यवसायीहरूको भनाइमा, दशैं–तिहारलाई लक्षित गरी ल्याइएका ‘बम्पर अफर’ र ठूलो आम्दानीको योजना अब खरानीमा सीमित छ। सरकारले त्वरित क्षतिपूर्ति र सुरक्षाको प्रत्याभूति नदिए उद्योग गहिरो संकटमा पर्ने चेतावनी उनीहरूले दिएका छन्।
भदौ २४ गतेको रातले नेपालको अटो उद्योग मात्र होइन, हजारौं ग्राहक र उद्यमीको सपना समेत जलाएको छ। अब उद्योगलाई पुनर्जीवित गर्न सरकार, व्यवसायी र सरोकारवाला सबैको एकजुटता अपरिहार्य भएको अटो व्यवसायीहरूको आग्रह छ।
