एक नम्बर प्रदेशमा मिल्क होली डे अन्त्यको प्रयास
काठमाडौं,२ बैशाख। एक नम्बर प्रदेशमा मिल्क होली डे अन्त्यका लागि धूलो दूध बनाउने नयाँ कारखाना निर्माण गरिने भएको छ ।प्रदेश सरकार, सहकारी र निजी क्षेत्रको साझेदारीमा मिल्क पाउडर प्लाण्ट निर्माण गर्न लागिएको हो । विभिन्न सहकारीहरु मिलेर सुनसरीको इटहरी उपमहानगरपालिका तरहरामा २८ करोड ३० लाख रूपैयाँ लगानीमा निर्माण गरिने सो पाउडर प्लाण्टका लागि प्रदेश सरकारले २० करोड रुपैयाँ उपलब्ध गराउने भएको छ। बाँकी ८ करोड ३० लाख रुपैयाँ सहकारी र अन्य डेरीहरुले लगानी गर्ने सम्झौता भएको छ । एक नम्बर प्रदेशमा वार्षिक ५ लाख ६१ हजार मेट्रिक टन दुध उत्पादन हुदै आएको छ ।
अन्तर्राष्ट्रिय मान्यता अनुसार प्रति व्यक्ति ९१ लिटर दुध आवश्यक पर्नेमा एक नम्बर प्रदेशमा प्रति व्यक्ति १ सय १६ लिटर दुध उत्पादन भएकाले मिल्क होलिडे गर्नुपर्ने बाध्यता छ । एक नम्बर प्रदेशमा हाल विराटनगर दुग्ध वितरण आयोजनामा रहेको एउटा मात्रै मिल्क पाउडर प्लाण्ट संचालनमा छ ।मिल्क पाउडर प्लाण्टका लागि मुख्यमंत्री शेरधन राईको उपस्थितिमा एक नम्बर प्रदेशका भूमि व्यवस्था, कृषि तथा सहकारी मंत्रालयका सचिव हस्त बहादुर विष्ट र कामधेनु डेरीका तर्फबाट बाबुराम खत्रीले सम्झौता गर्नुभयो । सो कारखाना आर्थिक वर्ष २०७६/०७७ मा सम्पन्न गर्ने लक्ष्य राखिएको छ। यसैगरी विराटनगरमा बधशाला निर्माणका लागि प्रदेश सरकारले विराटनगर महानगरपालिकालाई ३ करोड रुपैया उपलब्ध गराएको छ ।
