नेपाल बैंक ८३ औं वर्षमा प्रवेश, निक्षेप तथा कर्जाका नयाँ योजना सार्वजनिक
काठमाडौं, २६ कात्तिक । नेपाल बैंक लिमिटेडले स्थापनाको ८३ औं वर्ष प्रवेश गरेको अवसरमा निक्षेप तथा कर्जाका नयाँ योजनाहरु सार्वजनिक गरेको छ । बैंकले आज काठमाडौंमा पत्रकार सम्मेलन गरी ग्रिन सेभिङ्ग निक्षेप र शुलभ आवस कर्जा योजना सार्वजनिक गरेको हो ।
निक्षेप योजनाअन्तर्गत ग्राहकले निःशूल्क रुपमा एटीएम भिसा डेविट कार्ड, मोवाईल बैंकिङ्ग रजिष्ट्रेशन सुविधा, एविविएस सुविधा र निःशूल्क इन्टरनेट बैंकिङ्ग सुविधा प्राप्त गर्न सक्ने छन् । उक्त योजनामा ग्राहकले ५० हजारसम्मको औषधोउपचार सुविधा र ५० लाखसम्मको दुर्घटना बीमा सुविधा प्राप्त गर्न सक्ने बैंकले जनाएको छ । निक्षेप खातामा निक्षेपकर्ताले ६.५ प्रतिशतको व्याज प्राप्त गर्नेछन् भने एक वर्षसम्म बैंकको डेविट कार्डबाट अन्य जुनसुकै बैंकको एटीएममा निःशूल्क कारोबारसमेत गर्न सक्नेछन् ।
त्यस्तै बैंकले सञ्चालनमा ल्याएको शुलभ आवास कर्जा योजनाअन्तर्गत ग्राहकले आफ्नै जग्गामा घर निर्माण, घर खरिद र घर मर्मत तथा सम्भार गर्नको लागि शुलभ व्याजदरमा कर्जा सुविधा प्राप्तगर्न सक्नेछन् । त्यसैगरी अन्य बैंक तथा वित्तीय संस्थामा रहेको असल आवास कर्जा स्वाप समेत गर्न सक्नेछन् । उक्त कर्जाको व्याजदरको आधार दरमा १ प्रतिशत देखि २ प्रतिशतसम्म प्रिमियम थप गरी कयम गरिएको छ । कर्जा योजनाअन्तर्गत ग्राहकहरुले अग्रिम भुक्तानी शूल्क तिर्नु नपर्ने जनाइएको छ ।
हाल बैंकले एक सय ६७ शाखा कार्यालय, २३ एक्सटेन्सन काउण्टर र एक सय २ एटीएममार्फत् सेवा दिँदै आएको छ ।
