शेयर कारोबार आइतवारबाट बन्द हुने सम्भावना, आइतबार नै निर्णय गर्ने बोर्डको तयारी
काठमाडौं, ८ चैत । सरकारले चैत ९ गतेदेखि २१ गतेसम्म अत्यावश्यक सेवा बाहेकका अन्य सेवा बन्द गर्ने घोषणा गरेपछि आइतवारदेखि शेयर कारोबार पनि बन्द हुने सम्भावना बढेको छ ।
प्रधानमन्त्री केपी शर्मा ओलीले शुक्रवार साँझ देशवासीका नाममा सम्बोधन गर्दै चैत ९ गतेबाट २१ गतेसम्म संघ, प्रदेश र स्थानीय तहका सार्वजनिक, सामुदायिक तथा निजी सेवा प्रदायक संस्थाहरूबाट प्रदान गरिने नेपाल राजपत्रमा प्रकाशन गरिए अनुसारका अत्यावश्यक सेवा बाहेकका अन्य सबै सेवाहरु बन्द हुने घोषणा गरेका छन् ।
शेयर कारोबार अत्यावश्यक सेवामा नपर्ने भएकाले बन्द हुने सम्भावना बढेको नेपाल धितोपत्र बोर्डका कामु निर्देशक अनुज रिमालले बताए । उनले भने–‘नेपाल राजपत्रमा १८ वटा अत्यावश्यक सेवामा धितोपत्र बजार संलग्न छैन् । बन्द गर्ने कि अनलाईनबाट नै कारोबार अगाडि बढाउँने भनेर आइतबार बोर्ड सञ्चालक समितिको बैठक बसेर निर्णय गछौं । अहिल्यै यो गर्ने भन्ने निर्णय भएको छैन् ।’
यस अघि बिहीबार पाँच वटा लगानीकर्ता संघहरुले चैत महिना भरी शेयर बजार बन्द गराउन माग गर्दै बोर्डमा ज्ञापनपत्र बुझाएका थिए ।
