४ महिनादेखि बन्द देशभरका होटलहरु आजबाट खुले
काठमाडौं, १५ साउन । कोरोना संक्रमण नियन्त्रणका लागि गरिएको लकडाउनका कारण विगत ४ महिनादेखि बन्द होटलहरु आजबाट खुलेका छन् । सरकारले साउन १५ बाट होटलहरु खोल्न पाउने निर्णय गरेपछि आजबाट देशभरका होटलहरु खुलेका हुन् ।
होटल संघ नेपाल (हान) ले स्वास्थ्यसम्बन्धी मापदण्डको पूर्ण पालना गरी होटलहरु सञ्चालनमा ल्याउन लागिएको जनाएको छ । काठमाडौं उपत्यकाका अधिकांश होटलहरु खुलेका छन् ।
त्यस्तै, पर्यटकीय नगरी पोखरा र चितवनको सौराहा होटलहरु पनि खुलेका छन् । पर्यटकीय प्रमुख गन्तव्यको रुपमा रहेको पोखराका होटेल व्यवसाय आन्तरिक पर्यटकलाई लक्ष्य गर्दै खुल्ने पोखरा होटेल व्यवसायी संघले जनाएको छ । उनीहरुले आन्तरिक पर्यटकलाई विशेष प्याकेजको समेत व्यवस्था गरेको जनाएका छन् ।
कोरोनाको महामारी अझै समाप्त नभइसकेको र हवाई उडानहरुपनि सञ्चालनमा नआईसकेकाले आन्तरिक पर्यटकहरुलाई लक्षित गनुको विकल्प नभएको होटेल व्यवसायीहरुले बताएका छन् ।
