‘उद्योग व्यवसायलाई निरन्तरता दिन नीति तथा कार्यविधि पारित, सहुलियत ऋण उपलब्ध गराइने’
काठमाडौं, २९ कात्तिक । कोरोना महामारीबाट प्रभावित उद्योग व्यवसायलाई निरन्तरता दिन सरकारले विशेष नीति ल्याउने भएको छ । कोभिड१९ बाट धराशयी भएका सबै प्रकारका उद्योग व्यवसायलाई सहुलियत ब्याजदरमा ऋण लगानी दिनेगरी सरकारले नीति र कार्यविधि पारित गरिसकेको सरकारका प्रवक्ता एवं सञ्चार तथा सूचना प्रविधिमन्त्री पार्वत गुरुङले बताएका छन् ।
शुक्रवार चलचित्र विकास बोर्डको स्थलगत निरीक्षण तथा अनुगमनपछि आयोजित समारोह मन्त्री गुरुङले सबै प्रकारका उद्योग तथा व्यवसायलाई निरन्तरता दिन उचित ब्याजदरमा ऋण उपलब्ध गराउन नेपाल सरकार मन्त्रिपरिषद्ले नीति र कार्यविधि पास गरेको र यसले कोभिड१९ बाट धराशायी भएका उद्योग सञ्चालनमा सहज हुने विश्वास लिएको बताएको राससमा उल्लेख छ ।
लगानी संरक्षण र प्रवद्र्धन गर्ने कुरामा सरकार गम्भीर रहेको भन्दै उनले यसका लागि सबैको उत्तिकै भूमिका र जिम्मेवारी रहने बताएका छन् । अहिलेको संकटलाई राज्य, नागरिक समाज, उद्यमीलगायत सबै मिलेर समाधान गर्नुपर्नेमा उनको जोड रहेको छ । ‘हामी सबै संयुक्त रूपमा लाग्यौं भने समस्या समाधान गर्न सकिन्छ,’ उनले भने, ‘सबै मिलौँ, आर्थिक संकटलाई सही रूपमा समाधान गरौं ।’
