पेट्रोलियम भण्डारण क्षमता विस्तारमा निगम, पाइपलाइनबाट दुई वर्षभित्र पेट्रोल ल्याउने

काठमाडौं, २७ पुस । पूर्वाधारमा तीव्ररूपमा भएको विकासले पेट्रोलियम पदार्थको माग बढ्दै गएपछि नेपाल आयल निगमले यसको भण्डारण क्षमता विस्तारलाई प्राथमिकता दिएको छ । पेट्रोलियम पदार्थको माग प्रत्येक वर्ष दुई अंकको दरले वृद्धि हुँदा माग र आपूर्तिबीच सन्तुलनका लागि भण्डारणहरूको विस्तार तथा अन्य भौतिक पूर्वाधारको निर्माण गरिएको निगमको ५१औं वार्षिकोत्सवको अवसरमा आइतवार कार्यकारी निर्देशक सुरेन्द्रकुमार पौडेलले बताएका छन् ।

सोही अनुरूप निगमको वार्षिक नीति तथा कार्यक्रमस्वरूप चालू आर्थिक वर्षमा गण्डकी प्रादेशिक कार्यालय पोखरा र २ नं प्रादेशिक कार्यालय अमलेखगञ्जमा भण्डारणगृहको निर्माण र विस्तारको काम शुरू भएको उनले जानकारी दिएका छन् ।

यसैगरी झापा र धनुषामा ग्यास बोटलिङ प्लान्ट र भण्डारण निर्माण, अमलेखगञ्ज–चितवन लोथर पेट्रोलियम पाइपलाइन विस्तार, सिलगुढी–झापा पाइपलाइन निर्माण, झापाको चारआलीमा भण्डारणगृह निर्माण तथा नेपालगञ्ज र धनगढीमा भण्डारण क्षमता अभिवृद्धिका लागि जग्गा प्राप्ति गरेर पूर्वाधार विकासको काम भएको निगमले बताएको छ ।

यसैगरी निगमका कार्यकारी निर्देशक पौडेलले अबको दुई वर्षभित्र पाइपलाइनबाट पेट्रोल ढुवानी हुने बताए । पेट्रोलियम पाइपलाइनमार्फत हाल डिजेलमात्र आयात भइरहेकामा पेट्रोलसमेत ल्याउने तयारी भएको जानकारी उनले दिए ।

मोतिहारी–अमलेखगञ्ज पेट्रोलियम पाइपलाइन क्षमताको विस्तार गरेर डिजेलको सम्पूर्ण आयात सम्भव भएसम्म पाइपलाइनमार्फत मात्रै गर्ने व्यवस्था गर्न लागिएको उनको भनाइ छ । निगम सञ्चालक समितिका अध्यक्ष एवं वाणिज्य तथा आपूर्ति सचिव वैकुण्ठ अर्यालले पछिल्लो समय निगमले पूर्वाधार निर्माणमा फड्को मारेको बताए ।