पर्यटन प्रवर्द्धन एवं अन्तर्राष्ट्रियकरणका लागि लुम्बिनीको ब्रान्डिङ गरिँदै
रुपन्देही, २५ फागुन । बुद्ध जन्मस्थल लुम्बिनीको पर्यटन प्रवद्र्धन एवं अन्तर्राष्ट्रियकरणका लागि लुम्बिनीको ब्रान्डिङ शुरू गरिएको छ । नेपाल पर्यटन बोर्डले यसको ब्राण्डिङ अघि बढाएको हो । लुम्बिनी नाम लेखाइको ढाँचा, रङ र लोगोलाई अन्तर्राष्ट्रियरूपमा परिचित गराउने उद्देश्यले सोमवार ब्रान्डिङसम्बन्धी छलफल कार्यक्रम समेत भएको छ ।
लुम्बिनीसँग सरोकारी संघसंस्था, प्रदेश सरकार, पर्यटन विज्ञहरुबीच रुपन्देही भएको कार्यक्रममा लुम्बिनीका लागि ब्रान्डिङ प्रस्ताव गरिएको हो । बुद्ध रङ, अशोका पिल्लर, बुद्ध जन्मस्थल र बुद्ध धर्मसँग सम्बन्धित विभिन्न तथ्यलाई प्रभावकारी ढङ्गले ब्रान्डिङमा प्रस्ताव गरिएको राससमा उल्लेख छ ।
लुम्बिनी प्रदेश योजना आयोगका उपाध्यक्ष डा ईश्वर गौतमले लुम्बिनीको प्रभावकारी प्रचारप्रसार र पर्यटन प्रवद्र्धनका लागि नेपाल पर्यटन बोर्डले थालेको लुम्बिनी ब्रान्डिङ उपलब्धिमूलक हुने बताएका छन् । निजी क्षेत्र, सङ्घीय सरकार, प्रदेश सरकार र पर्यटन बोर्डले एकीकृतरूपमा लुम्बिनीको प्रवद्र्धनमा लाग्नुपर्नेसमेत उनले जोड दिए ।
लुम्बिनी प्रदेश सरकारका उद्योग, पर्यटन, वन तथा वातवरण मन्त्रालयका सचिव डा राजेन्द्र केसीले सरकारले सधैँ लुम्बिनीलाई केन्द्रमा राखेर काम गरिरहेको बताए ।
नेपाल पर्यटन बोर्डका कार्यकारी प्रमुख डा धनञ्जय रेग्मीले लुम्बिनीमा पर्यटकको बसाइ लम्ब्याउन विशेष योजना ल्याउनुपर्ने बताए । लुम्बिनीको प्रवद्र्धनका लागि पर्यटन बोर्डले सबैको सहकार्य र सुझावलाई अङ्गीकार गर्दै ब्रान्डिङ गर्न थालिएको उनको भनाइ छ ।
नेपाल एसोसिएशन अफ ट्राभल एन्ड टुर एजेन्ट (नाट्टा)का अध्यक्ष अच्युत गुरागाईंले निजीक्षेत्रले पर्यटन क्षेत्रमा गरेको योगदानलाई सरकार र सम्बन्धित निकायले विशेष ध्यान दिनुपर्ने बताए । लुम्बिनी विकास कोषका वरिष्ठ अधिकृत ज्ञानिन राईले लुम्बिनीको ऐतिहासिक, सांस्कृतिक, पर्यटकीय र अन्तर्राष्ट्रिय महत्व लुम्बिनीको ब्रान्डिङपश्चात् अझै बढेर जाने बताए ।
