कर्णाली प्रदेशले ल्यायो प्रथम पञ्चवर्षीय योजना, जीडीपीमा १८.८ प्रतिशत योगदान पुर्याउने लक्ष्य
सुर्खेत, ६ चैत । कर्णालीको प्रथम पञ्चवर्षीय योजना सार्वजनिक गरिएको छ । प्रथम पञ्चवर्षीय योजनामा आर्थिक वर्ष २०७६÷७७ देखि ०८०÷८१ सम्म विभिन्न २० सूचकको दीर्घकालीन लक्ष्य साथ विहीबार सार्वजनिक गरिएको हो । पञ्चवर्षीय योजनाले कुल गार्हस्थ्य उत्पादन बढाउने लक्ष्यलाई प्रमुख प्राथमिकतामा राखेको छ ।
आर्थिक वर्ष २०७५÷०७६ मा कुल गार्हस्थ्य उत्पादनमा कर्णाली प्रदेशको योगदान ५.७ प्रतिशत रहेकामा आव २०८०÷०८१ मा १८.८ प्रतिशत पुर्याउने लक्ष्य राखिएको छ । समग्र आर्थिक विकासका लागि लक्ष्यमा पुग्नका लागि योजना अवधिमा कुल ५ खर्ब २१ अर्ब ४७ करोड स्थिर पूँजी लगानी आवश्यक रहेकोमा कृषितर्फ ९७ अर्ब १५ करोड, उद्योगमा २ खर्ब ३५ अर्ब ८१ करोड, सेवा क्षेत्रमा १ खर्ब ८८ खर्ब ५१ करोड लगानी आवश्यक रहेको आयोगका सदस्य डा. दीपेन्द्र रोकायाले जानकारी दिए । यसका लागि सार्वजनिक क्षेत्रबाट ५३.६६ प्रतिशत, निजीक्षेत्रबाट ४२.६५ प्रतिशत र सहकारी क्षेत्रबाट ३.६९ लगानी हुने अनुमान गरेका छन् । उनका अनुसार प्रदेशको अर्थतन्त्रमा क्षेत्रगत योगदानमा बृद्धि गर्ने पञ्चवर्षीय योजनाको लक्ष्य रहेको छ ।
योजना सार्वजनिक कार्यक्रममा बोल्दै मुख्यमन्त्ती महेन्द्रबहादुर शाहीले विकास सबैको साझा एजेण्डा भएकाले सबै एक ठाउँमा उभिन आवश्यक रहेको औल्याए । लगानी भित्र्याउन बजेटको सही सदुपयोग गर्दै लगानीका लागि वातावरण सिर्जना गर्ने दायित्व सरकारको भएको उनले बताए ।
