राष्ट्र बैंकले १३ अर्ब २५ करोडको ट्रेजरी बिल जारी गर्ने
काठमाडौं, २५ असोज । नेपाल राष्ट्र बैंकले १३ अर्ब २५ रुपैयाँको ट्रेजरी बिल जारी गर्ने भएको छ । राष्ट्र बैंकले ९१ दिन, १८२ दिन र १ वर्षको लागि ट्रेजरी बिल जारी गर्न लागेको हो । असोज ३१ गते जारी हुने यस ट्रेजरी बिलका लागि आज दिउँसो ३ बजे बोलकबोल हुनेछ ।
केन्द्रीय बैंकले ९१ दिनको लागि ८ अर्ब रुपैयाँको ट्रेजरी जारी गर्न लागेको हो । यो ट्रेजरी पुस २७ गते परिपक्व हुनेछ । १८२ दिनको लागि २ अर्ब २५ करोड रुपैयाँको ट्रेजरी बिल चैत २९ गते परिपक्व हुनेछ । यस्तै १ वर्षको लागि जारी गर्न लागेको ३ अर्ब रुपैयाँ बराबरको ट्रेजरी बिल २०७९ असोज २५ गते परिपक्व हुनेछ ।
