‘ऊर्जा सङ्कटलाई नवीकरणीय ऊर्जा विकास गर्ने अवसरको रूपमा लिन सकिने’
स्वीट्जरल्याण्ड, ८ माघ । विश्व आर्थिक मञ्चको सन् २०२३ को वार्षिक बैठकका सहभागीहरूले उर्जा सङ्कटलाई स्वच्छ ऊर्जातर्फ विश्वको सङ्क्रमणलाई गति दिने अवसरका रूपमा हेर्नुपर्ने बताएका छन् ।
उक्त भेलाका सहभागी तथा कोलम्बिया युनिभर्सिटीको युरोपियन इन्स्टिच्युटका निर्देशक एडम टुजले स्वच्छ र हरित ऊर्जा क्षेत्रको सङ्क्रमणले देश र क्षेत्रबीच सहकार्यका लागि थप अवसर सिर्जना गर्ने विश्वास व्यक्त गरेका छन् । यसलाई उनले विश्वव्यापी सम्बन्धमा ‘नयाँ स्वरूप’ बताएका छन् ।
वार्षिक बैठकको केही दिन अघि जारी गरिएको ‘ऊर्जा सङ्क्रमणको सुरक्षा’ शीर्षकको एक रिपोर्टमा मञ्चले भनेको छ, ‘यो ऊर्जा सङ्कटले उन्नत प्रविधिहरू र बदलिँदो ईन्धन सङ्कटको परिदृश्यमा देशहरूलाई ऊर्जा सुरक्षाको लागि दृष्टिकोणलाई पुनः व्याख्या र सुधार गर्ने अवसर पनि प्रदान गर्दछ ।’
विद्युतीकरण र ऊर्जा दक्षताको मागलाई कम गर्न, कार्बनको समस्या कम गर्न, ऊर्जा आपूर्ति र पूर्वाधारमा लगानीकर्ताहरूलाई भरपर्दो सङ्केतहरू प्रदान गर्न, दक्षता अधिकतम गर्न र ऊर्जा सङ्कट न्यूनीकरणको लागत कम गर्न क्षेत्रीय सहयोगीसँग समन्वय गर्न ऊर्जा सङ्क्रमण चुनौतीका साथै नयाँ अवसर पनि हो ।
‘आजको ऊर्जा सन्दर्भलाई आधार बनाउने चुनौतीहरू यति जटिल र अन्तरसम्बन्धित छन् कि तिनीहरू केवल संरचनात्मक समाधानको साथ समाधान गर्न सकिन्छ । अल्पकालीन सुधारमा भर पर्दा दिगो, स्वच्छ र किफायती ऊर्जा प्रणालीमा सङ्क्रमणमा बाधा पुग्ने छ,’ प्रतिवेदनमा भनिएको छ ।
