सानिमा बैंकको लाभांश घोषणा, नगदभन्दा बोनस बढी
काठमाडौं, २९ भदौ। सानिमा बैंक लिमिटेडले गत आर्थिक वर्ष २०७९/०८० को सञ्चित मुनाफाबाट कुल १४.७० प्रतिशत लाभांश दिने घोषणा गरेको छ । बैंक सञ्चालक समितिको बिहीबार सम्पन्न बैठकले गत आर्थिक वर्षको सञ्चित मुनाफाबाट हाल कायम चुक्तापूँजीको ९ प्रतिशत बोनस शेयर र कर प्रयोजनसहित ५.७० प्रतिशत नगद लाभांश दिने प्रस्ताव गरेको हो ।
हाल यो बैंकको चुक्तापूँजी ११ अर्ब ३२ करोड ७३ लाख रुपैयाँ रहेको छ । यो चुक्तापूँजीको आधारमा बैंकले लाभांश दिन लागेको हो । बैंकले यो वर्ष गत वर्षकोभन्दा बढी लाभांश दिने प्रस्ताव गरेको हो ।
गत वर्ष बैंकले १० प्रतिशत बोनस शेयर र कर प्रयोजनका लागि ०.९८ प्रतिशत नगद लाभांश गरी १०.९८ प्रतिशत लाभांश दिएको थियो ।
यो वर्षका लागि बिहीबार प्रस्ताव गरिएको लाभांश नेपाल राष्ट्र बैंकबाट स्वीकृत भई बैंकको आगामी साधारण सभाबाट पारित भएपछि लगानीकर्ताले प्राप्त गर्ने छन् ।
