७ महिनामा सरकारले उठायाे ५ खर्ब ६७ अर्ब राजस्व
काठमाडाैं, १ फागुन । चालु आर्थिक वर्ष २०८०/८१ को माघ महिनासम्ममा सरकारकाे राजस्व संकलन लक्ष्यकाे ३९.८९ प्रतिशत मात्र भएकाे छ ।
महालेखा नियन्त्रक कार्यालयका अनुसार ७ महिनाकाे अवधिमा ५ खर्ब ६७ अर्ब ४० कराेड ३० लाख रूपैयाँ बराबर मात्र राजस्व संलन भएको छ ।
यस अवधिमा कुल १४ खर्ब २२ अर्ब ५४ करोड १७ लाख रुपैयाँबराबर राजस्व उठाउने सरकारी लक्ष्य रहेकाे थियाे ।
गत आर्थिक वर्षकाे यहि अवधिमा सरकारकाे राजस्व संकलन लक्ष्यकाे ३६.६८ प्रतिशत अर्थात ५ खर्ब १४अर्ब ६८कराेड ९६ लाख रूपैया बराबर मात्र भएकाे थियाे । गत वर्षकाे तुलनामा भने याे ३.२१ प्रतिशतले बढी हाे ।
यसैबीच सोमबार बजेटको अर्धवार्षिक समिक्षाका सन्दर्भमा आयोजित पत्रकार सम्मेलनमा अर्थमन्त्री डा. प्रकाशशरण महतले लक्ष्य अनुरूपको राजस्व संकलन अभिवृद्धि गर्न राजस्व प्रणालीलाई प्रविधिमैत्री, स्वचालित, पारदर्शी बनाउने बताएका छन् ।
लक्ष्य अनुरूपको राजस्व संकलन अभिवृद्धि गर्न राजस्व प्रणालीलाई प्रविधिमैत्री, स्वचालित, पारदर्शी र करदातामैत्री बनाई स्वेच्छिक कर सहभागिता एवम् कर परिपालना अभिवृद्धि गर्ने उनकाे भनाइ छ ।
