प्रधानमन्त्री ओलीसँग थाइल्याण्डका व्यावसायीहरूको भेटवार्ता, नेपालमा लगानी गर्न आग्रह
काठमाडौं, चैत २१ । थाइल्याण्डको औपचारिक भ्रमणमा रहेका प्रधानमन्त्री केपी शर्मा ओलीसँग आज बैङ्ककमा थाइल्याण्डका वरिष्ठ व्यावसायीहरूको भेटवार्ता भएको छ ।
भेटका अवसरमा नेपाली व्यवसायी प्रतिनिधिमण्डलका सदस्यहरू पनि सहभागी थिए । प्रधानमन्त्री ओली थाइल्याण्डको औपचारिक भ्रमण र बहुक्षेत्रीय प्राविधिक तथा आर्थिक सहयोगका लागि बङ्गालको खाडीको प्रयास (बिम्स्टेक)को छैटौँ शिखर सम्मेलनमा भाग लिन मङ्गलबार बैङ्कक प्रस्थान गरेका थिए ।
उक्त अवसरमा प्रधानमन्त्री ओलीले थाइल्यान्डले सिकेका ज्ञान, सीप र हासिल गरेको नवीनतम प्रविधिहरू नेपालमा भित्र्याउनसके र थाइल्यान्डका लगानीकर्ताहरूले नेपालमा लगानी गर्नसके नेपालले पनि छिट्टै समृद्धि हासिल गर्न सक्ने उनले बताए ।
उनले नेपालमा अहिले लगानीको वातावरण पनि बनेको र लगानीको सुरक्षाका लागि सरकारले हदैसम्म लचिलो भएको र त्यसअनुरुप कानुन पनि संशोधन गरेको विषयमा पनि जानकारी गराए। थाइल्यान्डका व्यवसायीहरूले नेपालको शिक्षा, स्वास्थ्य, प्रविधिका विषयहरूमा लगानी गर्न इच्छुक रहेको कुरा व्यक्त गर्नुभएको उद्योग वाणिज्य महासंघका अध्यक्ष चन्द्रप्रसाद ढकालले जानकारी दिए ।
नेपाल—थाइल्यान्डको सम्बन्ध पर्यटनमा तुलनात्मक रूपमा राम्रो रहेको छ । थाइल्यान्ड बौद्धमार्गी देश भएकाले पनि बहुसङ्ख्यक बौद्धमार्गीहरु बुद्ध जन्मिएको देश नेपालको लुम्बिनी भ्रमणमा आउने गर्दछन् । यसको फरक किसिमको सद्भाव र सम्मान छ । त्यसले पनि पर्यटनबाट लगानी भित्र्याउन सकिने प्रचुर सम्भावना रहेको छ ।
थाइल्यान्डका व्यवसायीहरूले नेपालमा लगानीका लागि कृषि र प्रविधिका विषयहरूमा बढी जोड दिइरहेका छन् । नेपालमा रहेका उद्योगी छाता संगठनहरुको निरन्तरको प्रयास र पछिल्लो समय सरकारले लगानीका लागि कानुन संशोधन गरी बनाएको अनुकूल वातावरणको प्रभावले धेरै लगानीकर्ताहरु आकर्षित हुने सरकारको विश्वास रहेको छ ।
बुधबार प्रधानमन्त्री ओली र उनका थाई समकक्षीबीच नेपाल–थाइल्याण्ड सम्बन्धका विविधि विषयमा छलफल भएको परराष्ट्र मन्त्रालयले जनाएको छ ।
प्रधानमन्त्री ओली भोलि चैत २२ गते बिम्स्टेक शिखर सम्मेलनमा सहभागी हुनेछन् । शिखर सम्मेलनका क्रममा सदस्य मुलुकका समकक्षी एवं राष्ट्रप्रमुखहरूसँग भेटवार्ता हुनेछ ।
