गभर्नर छनोट समितिमा डा. पोषराज पाण्डे नियुक्त, कांग्रेस निकट अर्थशास्त्रीको इन्ट्री
काठमाडाैं, १ जेष्ठ । सरकारले गभर्नर छनोट समितिको रिक्त विज्ञ सदस्य पदमा अर्थशास्त्री डा. पोषराज पाण्डेलाई नियुक्त गरेको छ। बुधबार बसेको मन्त्रीपरिषद्को बैठकले यसअघि विज्ञ सदस्य रहेका डा. विश्व पौडेलले राजीनामा दिएपछि रिक्त रहेको पदमा डा. पाण्डेलाई मनोनयन गरेको हो।
डा. पाण्डे नेपाली कांग्रेस निकट अर्थशास्त्रीका रूपमा परिचित छन्। उनले अर्थशास्त्र क्षेत्रमा लामो समयदेखि काम गर्दै आएका छन् र यसअघि पनि वित्तीय नीतिगत क्षेत्रमा महत्वपूर्ण योगदान दिएका थिए।
गभर्नर नियुक्ति प्रक्रिया अघि बढ्ने
सरकारले गभर्नर नियुक्ति प्रक्रिया अघि बढाउन डा. पाण्डेलाई समिति सदस्यमा मनोनयन गरेको हो। राष्ट्र बैंकको गभर्नर पद रिक्त रहेको अवस्थामा नयाँ नियुक्तिको तयारी भइरहेको छ।
समितिमा अब डा. पाण्डेसहितका सदस्यहरूले गभर्नरका लागि योग्य उम्मेदवारको छनोट गर्नेछन्। तर, अर्का सदस्य तथा पूर्व गभर्नर महाप्रसाद अधिकारीको वैधानिकता विवाद सर्वोच्च अदालतमा पुगिसकेको छ। अधिकारीलाई गैरकानुनी ठहर गर्दै मुद्दा दायर गरिएको छ।
समिति सदस्यमा विवाद
अहिलेको समितिमा रहेका महाप्रसाद अधिकारीको नियुक्ति गैरकानुनी रहेको भन्दै सर्वोच्च अदालतमा मुद्दा परेको छ। यदि अदालतले अधिकारीको नियुक्ति खारेज गर्ने फैसला सुनाएमा गभर्नर छनोट प्रक्रियामा पनि थप जटिलता आउन सक्छ।
