संसदमा तीन महत्वपूर्ण विधेयकहरू छलफलको चरणमा, हवाई सेवा, नागरिक उड्डयन र स्वास्थ्य विज्ञान विश्वविद्यालय विधेयक प्रस्तुत

काठमाडाैं, ४ जेष्ठ । प्रतिनिधिसभाको बैठक आज सुरु भएको छ। बैठकमा आजको कार्यसूची अनुसार तीन महत्वपूर्ण विधेयकहरू छलफलका लागि सम्बन्धित समितिमा पठाउने प्रस्ताव पेस गरिँदैछ।

संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले ‘नेपाल हवाई सेवा प्राधिकरण विधेयक, २०८१’ लाई धारावाहिक छलफलका लागि सम्बन्धित समितिमा पठाउन प्रस्ताव गर्नेछन्। यो विधेयकले हवाई सेवा क्षेत्रमा थप सुधार र नियमन ल्याउने लक्ष्य लिएको छ।

यसैगरी, ‘नेपाल नागरिक उड्डयन प्राधिकरण विधेयक, २०८१’ पनि मन्त्री पाण्डेले समितिमा पठाउने प्रस्ताव पेश गर्नेछन्। यस विधेयकले नागरिक उड्डयनको नियमन र व्यवस्थापनलाई थप पारदर्शी र प्रभावकारी बनाउने उद्देश्य राखेको छ।

त्यसैगरी, शिक्षा, विज्ञान तथा प्रविधि मन्त्री रघुजी पन्तले राष्ट्रिय सभाबाट उत्पत्ति भएको ‘दशरथ चन्द स्वास्थ्य विज्ञान विश्वविद्यालय विधेयक, २०८०’ लाई छलफलका लागि प्रस्तुत गर्नेछन्। यो विधेयकमा शिक्षा, स्वास्थ्य र प्रविधि क्षेत्रमा नयाँ विश्वविद्यालय स्थापनाका लागि प्रस्ताव गरिएको छ।

शिक्षा, स्वास्थ्य र सूचना प्रविधि समितिको प्रतिवेदनसहित प्रस्तुत हुने यो विधेयकमा विभिन्न पक्षहरूसँगको समन्वय गरी नयाँ विश्वविद्यालय स्थापनाका लागि आवश्यक नीतिगत संरचना तयार गर्ने प्रस्ताव गरिएको छ।