नेपाल राष्ट्र बैंकले तरलता व्यवस्थापनका लागि बजारबाट २५ अर्ब रुपैयाँ उठाउने
काठमाडाैं, २५ जेष्ठ । तरलता व्यवस्थापनको उद्देश्यसहित नेपाल राष्ट्र बैंकले बजारबाट २५ अर्ब रुपैयाँ उठाउने तयारी गरेको छ। राष्ट्र बैंकले २१ दिनको अवधिका लागि निक्षेप संकलन गर्न बैंक तथा वित्तीय संस्थाहरूसँग प्रस्ताव मागेको हो।
यस प्रयोजनका लागि राष्ट्र बैंकले अनलाइन बोलकबोल प्रणालीमार्फत रकम संकलन गर्नेछ। बोलकबोल प्रक्रिया आज (आइतबार) अपराह्न ३ बजे हुने राष्ट्र बैंकले जानकारी दिएको छ। निक्षेप संकलन उपकरणमार्फत राष्ट्र बैंकले छोटो अवधिको तरलता व्यवस्थापन गर्न यो प्रक्रिया अघि सारेको हो।
राष्ट्र बैंकका अनुसार संकलित रकमको साँवा तथा ब्याजको भुक्तानी साउन ४ गते (२०८२ साल) गरिनेछ। हालसम्म राष्ट्र बैंकले विभिन्न पटकमा निक्षेप संकलनमार्फत २ खर्ब ३१ अर्ब रुपैयाँ संकलन गरिसकेको छ ।
