संविधानिक निकायका ५२ पदाधिकारी नियुक्तिविरुद्धको मुद्दामा आज सर्वोच्चको फैसला हुँदै
काठमाडाैं, २८ जेष्ठ । संविधानिक निकायहरूमा गरिएको ५२ नियुक्तिविरुद्ध दायर गरिएको रिटमा सर्वोच्च अदालतले आज (बुधबार) फैसला सुनाउने भएको छ।
सर्वोच्च अदालतको संविधानिक इजलासले वैशाख ३२ गते (मे १५) अन्तिम सुनुवाइ सम्पन्न गरेपछि फैसला आजका लागि तोकेको हो। यो मुद्दा पहिलोपटक दर्ता भएको झन्डै साढे चार वर्षपछि फैसला हुन लागेको हो।
प्रधानन्यायाधीश प्रकाशमान सिंह राउतसहित न्यायाधीशहरू सपना प्रधान मल्ल, मनोजकुमार शर्मा, कुमार चुडाल र नहकुल सुवेदी रहेको इजलासले फागुन २९ गतेदेखि निरन्तर सुनुवाइ गर्दै आएको थियो।
इजलासले मुद्दासँग सम्बन्धित अधिवक्ताहरूलाई जेठ १७ गतेसम्म लिखित बहस पेश गर्न निर्देशन दिएको थियो।
मुद्दामा चुनौती दिइएका नियुक्तिहरू तत्कालीन प्रधानमन्त्री केपी शर्मा ओली नेतृत्वको सरकारले २०७७ मंसिर र २०७८ जेठमा अध्यादेशमार्फत गरेका थिए। उक्त नियुक्तिहरूमा अख्तियार दुरुपयोग अनुसन्धान आयोग (CIAA) सहित विभिन्न ५२ जना पदाधिकारीहरूको नियुक्ति गरिएको थियो।
वरिष्ठ अधिवक्ता दिनेश त्रिपाठी, अधिवक्ता ओमप्रकाश अर्याललगायतले ती नियुक्तिहरू संविधानविपरीत भएको भन्दै सर्वोच्च अदालतमा रिट दायर गरेका थिए।
उक्त नियुक्ति गर्ने बेलामा प्रधानमन्त्री ओली नेतृत्वको संविधानिक परिषद्को बैठकमा प्रतिनिधिसभाका सभामुख अग्निप्रसाद सापकोटा र प्रमुख प्रतिपक्षी दलका नेता शेरबहादुर देउवा अनुपस्थित थिए।
बैठकमा प्रधानमन्त्री ओली, तत्कालीन प्रधानन्यायाधीश चोलेन्द्र शम्शेर राणा र राष्ट्रियसभा अध्यक्ष गणेशप्रसाद तिमिल्सिना मात्र सहभागी थिए। उनीहरूले परिषद्को कोरम नपुगीकन निर्णय गरेको भन्दै नियुक्ति प्रक्रिया नै असंवैधानिक भएको दाबी गर्दै रिट परेको थियो।
