एआई र अन्तरिक्ष प्रविधिको संगमः स्पेसएक्सद्वारा xAI मा दुई अर्ब डलरको ऐतिहासिक लगानी

काठमाडाैं, २९ असार । अन्तरिक्ष प्रविधिमा क्रान्ति ल्याएका एलन मस्कले आफ्नो एआई कम्पनी xAI लाई थप मजबुत बनाउँदै SpaceX मार्फत २ अर्ब अमेरिकी डलरको ऐतिहासिक लगानी गर्ने सहमति गरेका छन्। The Wall Street Journal ले शनिबार प्रमुख लगानीकर्ताहरूको हवाला दिँदै यो जानकारी दिएको हो।

यो लगानी xAI ले गत महिना Morgan Stanley मार्फत घोषणा गरेको ५ अर्ब डलर बराबरको इक्विटी फन्डरेज योजनाको एक हिस्सा हो। यो SpaceX को xAI मा पहिलो सार्वजनिक लगानी हो र मस्कको अन्य कम्पनीमा गरिएको सबैभन्दा ठूलो लगानीहरूमध्ये एक मानिएको छ।

OpenAI सँगको प्रतिस्पर्धा र मस्कको रणनीति
xAI ले विश्वको अग्रणी एआई कम्पनी OpenAI सँग प्रतिस्पर्धा गर्दैछ, जसले ChatGPT सिर्जना गरेको हो। मस्कले आफ्नै व्यवसायिक साम्राज्य प्रयोग गर्दै xAI को द्रुत विकासलाई प्राथमिकता दिइरहेका छन्।

यसै वर्ष, उनले आफ्नो सामाजिक सञ्जाल प्लेटफर्म X (साविक Twitter) सँग xAI लाई एकीकृत गरे, जसले xAI को पहुँच अझ व्यापक बनाएको छ। यस एकीकरणपछि कम्पनीको मूल्यांकन ११३ अर्ब डलर पुगेको रिपोर्टमा उल्लेख छ।

Grok: मस्कको “विश्वकै सबैभन्दा स्मार्ट एआई”
xAI ले विकास गरेको Grok नामक एआई च्याटबोटलाई मस्कले “द स्मार्टेस्ट एआई इन द वर्ल्ड” भनेका छन्। यो एआई हाल Starlink इन्टरनेट सेवामा ग्राहक सहायता प्रणालीको रूपमा प्रयोग भइरहेको छ।

मस्कले हालै सार्वजनिक गरेका Grok 4 संस्करणमा मानवजस्तो देखिने Tesla Optimus रोबोट भित्र पनि एआई एकीकृत गर्ने योजना सार्वजनिक गरेका छन्, जसले भविष्यमा सेवा, सुरक्षा, उद्योगलगायतका क्षेत्रमा क्रान्ति ल्याउने अपेक्षा गरिएको छ।

SpaceX–xAI बीच भविष्यमा थप सहकार्यको संकेत
रिपोर्टअनुसार, मस्कका प्रतिनिधिहरूले SpaceX र xAI बीच आगामी दिनमा अझ धेरै व्यापारिक सहकार्य हुने संकेत दिएका छन्।