सेयर धितो कर्जा उछाल : एकै वर्ष डेढ खर्बभन्दा बढी प्रवाह
काठमाडाैं, १२ भदाैं । नेपालको पूँजी बजारमा लगानीकर्ताको आत्मविश्वास बढ्दै गएको प्रमाण सेयर धितो कर्जामा देखिएको तीव्र वृद्धिबाट प्रष्ट भएको छ । नेपाल राष्ट्र बैंकले प्रकाशित गरेको आर्थिक वर्ष २०८१/८२ को तथ्याङ्कअनुसार एकै वर्षमा बैंक तथा वित्तीय संस्थाले डेढ खर्बभन्दा बढी मार्जिन लोन अर्थात् सेयर धितो कर्जा प्रवाह गरेका छन् ।
राष्ट्र बैंकका अनुसार गत वर्ष साउनदेखि असार मसान्तसम्म कुल १ खर्ब ४० अर्ब ७० करोड २१ लाख रुपैयाँ सेयर धितो कर्जा प्रवाह भएको छ । यो अघिल्लो वर्षको तुलनामा ५६.१७ प्रतिशत धेरै हो । अघिल्लो वर्ष यस्तो कर्जा ९० अर्ब ९ करोड ३२ लाख रुपैयाँ मात्र थियो ।
नियामक निकायले मौद्रिक नीतिमा लचिलोपन अपनाएपछि सेयर बजारमा विशेषगरी ठूला लगानीकर्ताको सक्रियता बढेको देखिन्छ । एक करोडभन्दा माथिको सेयर कर्जा ७६.८७ प्रतिशत वृद्धि भई ९८ अर्ब ९२ करोड ७९ लाख रुपैयाँ पुगेको छ । अघिल्लो वर्ष यस किसिमको कर्जा ५५ अर्ब ९३ करोड २ लाख रुपैयाँ मात्र थियो ।
५० लाखदेखि १ करोडसम्मको सीमा भएका कर्जा पनि २८.९८ प्रतिशत बढेर १६ अर्ब २ करोड ९७ लाख रुपैयाँ पुगेको छ । यस्तै, २५ लाखदेखि ५० लाखसम्मका कर्जा २१.७९ प्रतिशतले बढेर १७ अर्ब ५६ करोड ६१ लाख रुपैयाँ भएको छ भने २५ लाखसम्मका कर्जा ११.८४ प्रतिशत बढ्दै ८ अर्ब १७ करोड ८४ लाख रुपैयाँ पुगेका छन् ।
वाणिज्य बैंकको वर्चस्व
वाणिज्य बैंकहरुले मात्रै गत वर्ष १ खर्ब १६ अर्ब ८० करोड ९४ लाख रुपैयाँ सेयर धितो कर्जा दिएका छन् । अघिल्लो वर्षको तुलनामा ६०.०६ प्रतिशतले वृद्धि भएको हो । अघिल्लो वर्ष यो ७० अर्ब ३४ करोड ४७ लाख रुपैयाँ थियो ।
बैंकहरूमध्ये सबैभन्दा धेरै कर्जा नबिल बैंकले प्रवाह गरेको छ । नबिलले एक वर्षमै १६ अर्ब ७६ करोड ३२ लाख रुपैयाँ कर्जा दिएको छ, जुन अघिल्लो वर्षको तुलनामा ४६.६९ प्रतिशत बढी हो ।
दोस्रो स्थानमा रहेको ग्लोबल आइएमई बैंकले १२ अर्ब ३० करोड ९३ लाख रुपैयाँ कर्जा प्रवाह गरेको छ, जुन ६३.७४ प्रतिशत वृद्धि हो ।
त्यस्तै, कुमारी बैंकको प्रवाह १० अर्ब ४३ करोड ३२ लाख रुपैयाँ पुगेको छ, जुन अघिल्लो वर्षको तुलनामा १३८.४० प्रतिशत वृद्धि हो ।
अन्य बैंकहरूको विवरण
- सिद्धार्थ बैंक : ९ अर्ब २८ करोड ७ लाख
- प्राइम बैंक : ८ अर्ब २८ करोड १५ लाख
- लक्ष्मी सनराइज : ८ अर्ब २५ करोड ४५ लाख
- नेपाल बैंक : ७ अर्ब ८६ करोड
- सिटिजन्स बैंक : ७ अर्ब २ करोड
- राष्ट्रिय वाणिज्य : ६ अर्ब १५ करोड
- प्रभु बैंक : ५ अर्ब ३४ करोड ४६ लाख
- कृषि विकास : ४ अर्ब ६५ करोड
- एभरेष्ट : ३ अर्ब ४४ करोड
- नेपाल इन्भेष्टमेन्ट मेगा : ३ अर्ब ३६ करोड
- सानिमा : ३ अर्ब ३१ करोड
- हिमालयन : २ अर्ब ७१ करोड
- माछापुच्छ्रे : २ अर्ब ५३ करोड
- एनएमबी : २ अर्ब ३९ करोड
- एनआइसी एशिया : २ अर्ब ५ करोड
- नेपाल एसबिआई : ६१ करोड
