वीरगञ्ज टेलिकममा तोडफोड, ३ करोडको क्षति
काठमाडाैं, ३० भदाै । गत भदौ २४ गते देशव्यापी आन्दोलनको क्रममा वीरगञ्ज घण्टाघरस्थित नेपाल टेलिकम कार्यालयमा ठूलो तोडफोड र आगजनी भएको छ। यस घटनाबाट करिब ३ करोड रुपैयाँ बराबरको क्षति भएको टेलिकम वीरगञ्जका प्रमुख पङ्कज साहले जानकारी दिएका छन्।
साहका अनुसार अराजक समूहको भीडले टेलिकमका कम्प्युटर, प्रिन्टर्स र अन्य महत्वपूर्ण उपकरणमा व्यापक क्षति पुर्याएको छ। आगजनीबाट महसुल काउन्टरमा समेत धेरै क्षति भएको छ।
पर्साका प्रमुख जिल्ला अधिकारी तोयनारायण सुवेदीले सरकारी कार्यालयमा भएको तोडफोड र क्षतिको पारदर्शी ढंगले मुचुल्का तयार गर्न निर्देशन दिएका छन्। उनले भने, “कार्यालयमा भएका क्षतिको मुचुल्का तयार गर्दा श्रव्यदृश्य र व्यवस्थित विवरण समावेश गर्न आवश्यक छ।”
सुवेदीका अनुसार जेनजी समूहको आन्दोलनको क्रममा वीरगञ्ज महानगर, आन्तरिक राजस्व कार्यालय लगायत विभिन्न सरकारी कार्यालय र सवारीसाधनमा अपूरणीय क्षति पुगेको छ। घटना सम्बन्धी मुचुल्का तयार गरेर यथार्थपरक विवरण संकलन गरी उचित कदम चाल्ने प्रक्रिया अघि बढाइँदैछ।
टेलिकमले प्रभावित कार्यालयलाई पुनः सञ्चालनयोग्य बनाउन शीघ्र मर्मत र क्षतिपूर्ति प्रक्रियामा लाग्ने तयारी गरेको छ।
