युवा वैज्ञानिक शिखर सम्मेलन–२०२५ दसौं संस्करण ललितपुरमा हुने

ललितपुर, १४ मंसिर । नेपालको आधिकारिक IUPAC adhering) संस्था नेपाल पोलिमर इन्स्टिच्युट (NPI) र नेशनल इन्स्टिट्युट अफ इन्जिनियरिङ एण्ड टेक्नोलोजी (NIET) को संयुक्त आयोजनामा युवा वैज्ञानिक शिखर सम्मेलन (YSS-2025) को दसौं संस्करण २०८२ पुस ११ र १२ (26–27 December, 2025) मा ललितपुरको कुपन्डोलस्थित NIET क्याम्पसमा हुने भएको छ।

देशभरका कक्षा ८ देखि १२ सम्म अध्ययनरत युवा वैज्ञानिक, अनुसन्धानकर्ता तथा नवप्रवर्तकहरूको सहभागितामा हुने यस सम्मेलनले युवालाई अनुसन्धान, वैज्ञानिक संवाद, नवप्रवर्तन र समस्या समाधानमा संलग्न गराउने उद्देश्य राखेको छ। YSS–2025 मा सहभागीहरूले पाँच प्रमुख श्रेणीहरू अन्तर्गत आफ्ना अनुसन्धान परियोजनाहरू प्रस्तुत गर्नेछन् ।

परियोजनाको मूल्यांकनमा नवीनता, अनुसन्धानको मौलिकता, वैज्ञानिक विधि र प्रस्तुतीकरणलाई मुख्य आधार बनाइनेछ। प्रत्येक श्रेणीका उत्कृष्ट परियोजनालाई ‘युवा वैज्ञानिक’ उपाधि, प्रमाणपत्र तथा पदक प्रदान गरिनेछ। यसका अतिरिक्त, विजयी सहभागीहरूलाई थाइल्याण्डमा हुने Asia Pacific Conference of Young Scientists (APCYS–2026) मा प्रतिनिधित्व गर्न आवेदन दिने योग्यता प्रदान गरिनेछ।

युवा वैज्ञानिक शिखर सम्मेलनले विगत नौ वर्षदेखि हजारौँ विद्यार्थीलाई वैज्ञानिक अनुसन्धान, नेटवर्किङ, नवप्रवर्तन र अन्तर्राष्ट्रिय स्तरका प्रतियोगिताहरू मा सहभागी हुन प्रेरित गर्दै आएको छ। यस वर्षको सम्मेलनमा विख्यात वैज्ञानिक तथा अनुसन्धानकर्ताबाट कीनोट व्याख्यान, प्यानल डिस्कसन, र युवा अनुसन्धानकर्ताहरूलाई अन्तर्राष्ट्रिय अवसरहरूमा पहुँच दिलाउने विशेष सत्रहरू पनि रहनेछन्।

यी हुन् अनुसन्धानका विषय
भौतिक विज्ञान, गणित, इन्जिनियरिङ र रोबोटिक्स
कम्प्यूटर विज्ञान र कृत्रिम बुद्धिमत्ता
रासायनिक तथा वातावरण विज्ञान
जीव विज्ञान
स्वदेशी ज्ञान र स्थानीय प्रविधि