अमेरिकाबाट ७ नेपाली नागरिक कारबाहीपछि निर्वासन, TPS अन्त्यले जोखिम बढ्यो
काठमाडाैं, २२ असाेज । सन् २०२१ देखि २०२५ जुलाईसम्म अमेरिकाबाट विभिन्न गम्भीर अपराधमा दोषी ठहर भएका सात नेपाली नागरिकलाई निर्वासन गरिएको छ। अमेरिकी आप्रवासन तथा सीमा सुरक्षा निकाय (ICE) का तथ्यांक अनुसार निर्वासन भएका व्यक्तिहरूले बाल यौन अपराध, हिंसात्मक आक्रमण, बल प्रयोग गरी चोरी, हतियारसहितको आक्रमण, र मादक पदार्थ वा मदिरा सेवनमा सवारी चलाउने जस्ता अपराध गरेका थिए।
निर्वासन प्रक्रिया न्युयोर्कको JFK, न्युरक, बोस्टनको लोगन लगायतका प्रमुख विमानस्थलबाट सम्पन्न भएको थियो।
त्यसमा, ३९ वर्षीय पुरुष जो २०२४ मा यौन अपराधमा दोषी ठहरिएका थिए र ३६ वर्षीय पुरुष जसलाई २०२३ मा यौन अपराधको दोष लागेको थियो, हालै मात्र इमिग्रेसन अदालतको आदेशपछि निर्वासन भएका हुन्।
अर्का ३० र ३५ वर्षीय पुरुषहरू बालबालिकाको शोषणका लागि सञ्चार माध्यम प्रयोग गरेको दोषी ठहरिएर २०२५ को सुरुमा अमेरिका बाहिर पठाइएका थिए।
ICE का रेकर्ड अनुसार, एक नेपाली नागरिकलाई मद्यपानमा सवारी चलाउने (DUI) दोषसिद्धिपछि नेपालभन्दा कतारमा निर्वासन गरिएको थियो, तर त्यसको कारण स्पष्ट छैन।
यस वर्ष नेपाली नागरिकहरूको निर्वासन दर तीव्र रूपमा बढेको छ। सन् २०२५ को सेप्टेम्बर महिनामा मात्र ५३ जना नागरिक फर्काइएका थिए। यसरी जनवरीदेखि अहिलेसम्म कुल २६८ निर्वासन भएका छन्—२२६ पुरुष र ४२ महिला। उच्च मासिक आंकडा मे, जुन, र सेप्टेम्बरमा देखिएको थियो।
यसैबीच, अमेरिकी नागरिकता तथा आप्रवासन सेवा (USCIS) ले असोज २०, २०२५ बाट नेपालीहरूको टेम्पोररी प्रोटेक्टेड स्ट्याटस (TPS) अन्त्य घोषणा गरेको छ। यसले ७,००० भन्दा बढी नेपाली नागरिकलाई सम्भावित निर्वासनको जोखिममा राखेको छ।
निर्वासन पश्चात काठमाडौमा आगमन हुने नागरिकहरूलाई इमिग्रेसन विभागबाट मानव तस्करी अनुसन्धान विभागमा छोटो समयको सोधपुछका लागि लैजान्छ।
अमेरिकास्थित नेपाली दूतावासले भने यात्रा कागजात उपलब्ध गराएर आफ्ना नागरिकको सुरक्षित फिर्ता सुनिश्चित गर्ने काम जारी राखेको छ।
