बीमा कम्पनीका सीईओको तलब सुविधामा नियामकको अंकुश

काठमाडौं, पुस २। बीमा क्षेत्रको नियामक बीमा समितिले बीमा कम्पनीहरुको प्रमुख कार्यकारी अधिकृत (सीईओ) को तलब सुविधामा अंकुश लगाएको छ । बीमा समितिले परिपत्र जारी गरी बीमा कम्पनीहरुलाई सीईओको तलब तथा अन्य सुविधाहरु तोकेको हो । खुला बजार अर्थतन्त्रमा नियामक निकायले सीईओको तलब सुविधा तोक्ने या नतोक्ने सम्बन्धमा लामो बहसपछि बीमा समितिले बीमा क्षेत्रलाई विवेकी नियमहरुबाट मार्गनिर्देश गर्नका लागि यस्तो सुविधा तोकेको हो । खासगरी बजारमा नयाँ बीमा कम्पनीहरुको आगमनपछि यस क्षेत्रमा अस्वस्थ प्रतिस्पर्धा नहोस् र प्रमुख कार्यकारीको असीमित तलब सुविधाका कारण थप समस्या नआउन भनेर निर्देशन जारी गरिएको बीमा समितिका कार्यकारी निर्देशक राजुरमण पौडेलले जानकारी दिए ।
बीमा समितिले जारी गरेको निर्देशन अनुसार, बीमा कम्पनीहरुले पछिल्लो तीन आर्थिक वर्षको औसत कर्मचारी खर्चको ६ प्रतिशत भन्दा बढी तलब सुविधा सीईओलाई दिन नपाइने व्यवस्था गरेको छ । यसरी सुविधा दिदाँ कम्पनीको पछिल्लो तीन वर्षको वासलातमा उल्लेख कुल सम्पत्तिको औसतको ०.५ प्रतिशत नाघ्न हुँदैन । उल्लेखित कुल कर्मचारी खर्चको ६ प्रतिशत या कुल सम्पत्तिको ०.५ प्रतिशत मध्ये जुन कम हुन्छ, त्यहीभित्र रहेर सीईओको तलब, सुविधा तोक्नुपर्छ । अर्कोतर्फ नयाँ कम्पनीहरुले पनि बीमा कम्पनीहरुको तीन वर्षको औसत कर्मचारी खर्चको ६ प्रतिशत वा कुल सम्पत्तिको ०.५ प्रतिशतलाई नै आधार मान्नुपर्ने हुन्छ । यद्यपि नयाँ कम्पनीहरुले सीईओलाई पहिलो चरणको करार अवधिमा बीमा उद्योगको औसतभन्दा बढीमा १५० प्रतिशतसम्म तलब सुविधा दिनसक्नछन् तर यसका लागि उनीहरुले कारण खुलाउनुपर्ने हुन्छ । अर्कोतर्फ, बीमा कम्पनीहरुले बोनस र अन्य इन्सेन्टिभ दिदाँ सीईओको तलबको ७० प्रतिशत नाघ्न हुँदैन । यस्तो इन्सेन्टिभ तलबको ४० प्रतिशतमात्र सीईओका लागि निष्काशन गर्न सकिन्छ । ७० प्रतिशतमध्ये बाँकी रहेको इन्सेन्टिभ ‘रिजर्भ फण्ड’ मा जम्मा हुन्छ र उक्त रिजर्भ फण्ड कम्पनी घाटामा गए कम्पनीका लागि प्रयोग हुन्छ जुन पछि पनि सीईओको व्यक्तिगत प्रयोजनका लागि फिर्ता हुँदैन ।
त्यस्तै, बीमा कम्पनीहरुले सीईओका लागि जीवन बीमा, दुर्घटना बीमा गरिदिन र प्रिमियम तिरिदिन सक्छन् । सीईओका एकाघरका परिवारले पनि स्वास्थ्य बीमा सुविधा निःशुल्क पाउँछन् । अर्कोतर्फ सीईओलाई बाह्य देशहरुमा यात्रा गर्दा ट्राभल र मेडिकल इन्स्योरेन्स उपलब्ध हुन्छ । कम्पनीले कर्मचारीका लागि छुट्याएको सेयर निश्चित मूल्य तिरेर सीईओले पनि निश्चित इकाई खरिद गर्न सक्छ । अर्कोतर्फ सीईओलाई कम्पनीले इन्टरनेट, मोबाइल फोन तथा यसको बील, ल्यापटप, इन्धन तथा चालक खर्च जस्ता सुविधाहरु दिन सक्छ । अर्कोतर्फ, बीमा कम्पनीहरुले सीईओको तलब तथा सुविधा तोक्दा कम्पनीको सोल्भेन्सी, बीमा बजार तथा कम्पनीको वित्तिय अवस्था, बीमा नवीकरण दर, बीमा परित्यागको अवस्था लगायत विभिन्न पक्षमा ध्यान दिनुपर्छ । अहिले बजारमा १७ जीवन बीमा कम्पनी तथा सोही संख्यामा निर्जीवन बीमा कम्पनीहरु छन् । ८ जीवन बीमा कम्पनी भर्खरै सञ्चालन अनुमतिपत्र पाएर सञ्चालनमा आएका हुन्, त्यस्तै बीमा समितिले तीन निर्जीवन बीमा कम्पनीका लागि पनि सञ्चालन अनुमतिपत्रका लागि आशयपत्र दिएको छ ।

Leave a Reply

Your email address will not be published. Required fields are marked *