‘नेपाल भ्रमण वर्ष २०२०’ सुरु हुन दुई साता बाँकी, सरकार उद्घाटनलाई भव्य बनाउने अन्तिम तयारीमा

काठमाडौं, ३० मंसिर । २० लाख पर्यटक भित्र्याउने लक्ष्य सहित मनाउन लागिएको ‘नेपाल भ्रमण वर्ष २०२०’ सुरु हुन अब दुई साता मात्र बाँकी छ । नेपाल सरकार यतिबेला भ्रमण वर्ष उद्घाटनको अन्तिम तयारीमा जुटेको छ ।

जनवरी १ मा भ्रमण वर्षको उद्घाटन कार्यक्रम तय गरिएको छ । सरकार यतिबेला उद्घाटन समारोहलाई भव्य बनाउन लागिरहेको संस्कृति पर्यटन तथा नागरिक उड्डयन मन्त्रालयका सचिव केदार बहादुर अधिकारीले जानकारी दिए । विभिन्न समिति र उपसमितिहरु बनाएर आवश्यक तयारीको कामलाई तीब्र पारिएको उनले जानकारी दिए ।

विश्व बजारमा नेपाललाई आकर्षक, सुरक्षित र मनोरम गन्तव्यका रूपमा स्थापित गर्न सरकारले गतआर्थिक वर्षको बजेट मार्फत ‘नेपाल भ्रमण वर्ष २०२०’ घोषणा गरेको हो ।

सरकारी तथ्यांक अनुसार सन् २०१८ मा करिब १२ लाख पर्यटक नेपाल आएका छन् । सन् २०२० मा लक्ष्य भेट्टाउन त्यो भन्दा ८ लाखभन्दा बढी पर्यटक ल्याउनुपर्ने छ । तर उक्त लक्ष्य भेटिनेमा सरकार स्वयंम र पर्यटक व्यवसायी पनि अझै विश्वस्त छैनन् ।

‘नर्मल ग्रोथको आधारमा पनि सन् २०२० मा १६–१७ लाख पर्यटक नेपाल आउछन् ।’ सचिव अधिकारीले भने, ‘लक्ष्य भेट्टाउन ३–४ लाख बढी संख्या आवश्यक पर्छ । त्यसैका लागि हामी प्रयासरत छौ ।’ सरकार आफै र नेपाल पर्यटन बोर्डले पनि बाह्य प्रवद्र्धनात्मक कार्यक्रम गरिरहेको र विदेश स्थित नेपाली दूतावास र गैरआवासीय नेपालीहरुलाई पनि प्रवद्र्धनमा सहयोग गर्न आग्रह गरेको सचिव अधिकारीले जानकारी दिए ।

ट्रेकिङ एजेन्सिज एसोसिएसन अफ नेपाल (टान) का अध्यक्ष खुमबहादुर सुबेदी पनि लक्ष्य भेटिनेमा ढु्क्क छैनन् । ‘लक्ष्य नै सबैभन्दा ठुलो कुरो होइन, यो सरकार, पर्यटन व्यवसायीको मात्र नभई सबै नेपालीको पर्व हो । ’ उनले भने, ‘त्यसकारण सबै मिलेर लाग्दा लक्ष्य त्यती टाढा पनि छैन ।’

सन् २०२० मा पर्यटकलाई नेपाल आउन आकर्षित गर्न टानका सदस्यहरुले २० प्रतिशत छुट सुविधा दिने उनले जानकारी दिए । टानका सदस्यहरु मार्फत मात्रै ८ लाख पर्यटक नेपाल भित्रने अनुमान उनको छ । ‘यो बेला नेपाल आउने पर्यटकलाई केही नयाँ दिन सक्नुपर्छ । त्यसका लागि सरकारले एयरपोर्ट देखि अन्य पर्यटकीय क्षेत्रमा रहेका समस्याहरुलाई हलगर्दै पर्यटनमैत्री वातावरण निर्माण गर्नुपर्छ ।’उनले भने ।

त्यस्तै, होटल संघ नेपालका उपाध्यक्ष विनायक शाहले पनि पूर्वाधार निर्माण ध्यान दिनुपर्ने बताए । उनले भने– ‘हाम्रो एयरपोर्टको अवस्था पनि राम्रो छैन, भारत र चीन जोड्ने सडक मार्गको अवस्था पनि उस्तै छ । त्यसको सुधारमा सरकार लाग्नुपर्छ ।’

गौतमबुद्ध विमानस्थललाई भ्रमण वर्षमै सञ्चालनमा ल्याउने सचिव अधिकारीले जनाए । त्यसले पनि संख्या बृद्धिमा सघाउ पुग्ने उनको अनुमान छ ।

उसो त यसअघि सरकारले सन् १९९८ र सन् २०११ मा पनि नेपाल भ्रमण वर्ष मनाएको थियो । सन् १९९८ मा ५ लाख र सन् २०११ मा १० लाख पर्यटक भित्र्याउने लक्ष्य लिएको थियो । तर दुबै वर्ष लक्ष्य अनुसार पर्यटक भित्रिएनन् ।

Leave a Reply

Your email address will not be published. Required fields are marked *