औसत ६५ प्रतिशत क्षमतामा हेटौंडा औद्योगिक क्षेत्रका सबै उद्योग सञ्चालन

हेटौंडा, २९ असोज । कोरोना महामारी र लकडाउनका कारण बन्द हेटौंडा औद्योगिक क्षेत्रका सबै उद्योग सञ्चालनमा आएका छन् । उक्त औद्योगिक क्षेत्रमा १११ वटा उद्योग रहेकोमा सबै उद्योग सुचारु भएको हेटौंडा औद्योगिक क्षेत्र व्यवस्थापन लिमिटेडको कार्यालयले बताएको छ ।
उक्त औद्योगिक क्षेत्रका उद्योगहरू औसत ६५ प्रतिशत क्षमतामा सञ्चालनमा आएका हुन्, जसमध्ये अत्यावश्यक खाद्यपदार्थ उद्योग ८० प्रतिशत र अन्य उद्योगहरू ५० प्रीतशत क्षमतामा सञ्चालित रहेको बताइएको छ । कोभिड–१९ नियन्त्रण तथा रोकथामका लागि गरिएको लकडाउनका कारण अत्यावश्यक बाहेकका अन्य उद्योगहरू लामो समयसम्म बन्द थिए । यसअघि बिस्कुट, चाउचाउ, बेकरी, खानेपानी, दाना र दुग्ध पदार्थबाहेक अन्य उद्योग बन्द भएकोमा अहिले ती उद्योग सञ्चालनमा आएको तर पूर्ण क्षमतामा सञ्चालनमा आउन नसकेको कार्यालयले बताएको छ ।
कार्यालयका अनुसार औद्योगिक क्षेत्रमा सञ्चालित उद्योगबाट प्रत्यक्ष वा अप्रत्यक्ष रूपमा करिब साढे १० हजार जनाले रोजगारी पाएका छन् । २०२० मंसिर २० गते स्थापित उक्त औद्योगिक क्षेत्रमा अहिले विभिन्न नयाँ उद्योग स्थापना गर्न करिब एक हजार ८८५ रोपनी जग्गाको छुट्टै व्यवस्थापन गरिएको छ । औद्योगिक क्षेत्रमा निजीक्षेत्रको करिब ५ अर्ब ५० करोड र सरकारी लगानी ९० करोड रुपैयाँ रहेको कार्यालयले जानकारी दिएको छ ।