७.५५ प्रतिशतले बढ्यो कामपाको बजेट खर्च

काठमाडौं, २५ साउन । गत आर्थिक वर्ष २०७८÷७९ मा काठमाडौं महानगरपालिकाको बजेट ४४.२४ प्रतिशत खर्च भएको जनाएको छ । बुधवार कामपाको गत आवको वार्षिक समीक्षा बैठकमा उक्त जानकारी गराइएको हो । यो अघिल्लो आर्थिक वर्षको तुलनामा ७.५५ प्रतिशतले बढी हो । अघिल्लो आर्थिक वर्ष २०७७÷७८ मा कामपाको बजेट ३६.५५ प्रतिशत खर्च भएको छ ।

गत आर्थिक वर्षका लागि कामपाले रु १६ अर्ब ५२ करोड ८७ लाख ११ हजार बजेट विनियोजन गरेको थियो । जसमा रु सात अर्ब ३१ करोड ३५ लाख २९ हजार चार सय ४२ खर्च भएको छ ।

बैठकमा कामपाका प्रमुख बालेन्द्र साहले चालू आर्थिक वर्षमा स्वीकृत कार्यक्रमलाई कार्ययोजना र समय तालिका बनाएर कार्यान्वयन गराउनुपनर्नेमा जोड दिए ।

जनप्रतिनिधिले बनाएका नीतिहरु कर्मचारीहरुले प्रभावकारी कार्यान्वयन गरी जनताले हेर्न, देख्न र महसुस गर्ने ठाउँ रहेको भन्दै कामपाका प्रवक्ता नवीन मानन्धरले, प्राथमिकता र जनसरोकारका विषयलाई प्राथमिकतामा राखेर चालु आवका कार्यक्रम सञ्चालन गर्नुपर्ने धारणा राखे ।

बैठकमा विभाग, आयोजना, एकाइ, सचिवालय गरी २४ क्षेत्रबाट प्रस्तुतीकरण हुनेछ । गएको वर्ष स्वीकृत नीति तथा कार्यक्रमका आधारमा कार्यान्वयन गरिएका र गर्न नसकिएका कार्यक्रमको मूल्याङ्कनका लागि समीक्षा बैठक आयोजना गरिएको हो ।