२१ अर्ब ७६ करोडले घट्यो विदेशी लगानी प्रतिबद्धता, ३२७ उद्योगका लागि ३३ अर्ब ३९ करोडको प्रस्ताव

काठमाडौं, १ साउन । गत आर्थिक वर्ष २०७९–८० मा नेपालमा ३२७ उद्योगका लागि ३२ अर्ब ३९ करोड ६० लाख रुपैयाँ बराबरको प्रत्यक्ष विदेशी लगानी (एफडीआई) प्रस्ताव आएको छ । उद्योग विभागका अनुसार उक्त संख्याका उद्योगले १७ हजार १२ जनालाई रोजगारीको प्रस्ताव गरेका छन् । गत असारमा मात्रै प्रस्तावित एफडीआई भने ३ अर्ब ९२ करोड रुपैयाँ बराबरको रहेको छ । ५४ उद्योगका लागि उक्त लगानी प्रतिबद्धता आएको हो ।

गत आर्थिक वर्षमा प्रतिबद्धता गरिएको एफडीआई अघिल्लो आर्थिक वर्षको भन्दा २१ अर्ब ७६ करोडले घटेको छ । अघिल्लो आर्थिक वर्ष २०७८÷७९ मा २९५ उद्योगका लागि ५४ अर्ब १५ करोड रुपैयाँ बराबरको विदेशी लगानी प्रतिबद्धता आएको थियो । गत आर्थिक वर्षसम्ममा कुल ५ हजा ८६० उद्योगका लागि ४ खर्ब ५२ अर्ब ६६ करोड रुपैयाँभन्दा बढीको एफडीआई प्रस्ताव आएको छ । उक्त संख्यामा उद्योग स्थापना हुँदा ३ लाख ९ हजार १३२ जनाले रोजगारी पाउने प्रस्ताव गरिएको छ ।