लक्ष्मी सन्राइज बैंकको नाफा दुई अर्ब २६ करोड, वितरणयोग्य मुनाफा बढ्यो
काठमाडौं, २१ साउन । लक्ष्मी सन्राइज बैंकले आर्थिक वर्ष २०७९/८० को चौथो त्रैमाससम्म दुई अर्ब २६ करोड १८ लाख रुपैयाँ नाफा आर्जन गरेको छ । आइतबार सार्वजनिक गत वर्षको चौथो त्रैमासम्मको अपरिष्कृत वित्तीय विवरण अनुसार नाफा ४९.४५ प्रतिशतले वृद्धि भएको हो ।
लक्ष्मी बैंक र सन्राइज बैंक १ः१ शेयर स्वाप रेसियोमा एकआपसमा मर्जरमा गरएका हुन् । मर्जरपछिको यी दुई बैंकको यो पहिलो वित्तीय विवरण हो ।
वित्तीय विवरण अनुसार अघिल्लो आर्थिक वर्षको सोही अवधिसम्ममा बैंकले एक अर्ब ५१ करोड ३४ लाख रुपैयाँ खुद नाफा कमाएको थियो ।
खुद ब्याज आम्दानी तथा सञ्चालन मुनाफा उलेख्य मात्रामा बढेकाले नाफा वृद्धिमा सहयोग पुगेको देखिन्छ ।
बैंकले गत वर्ष पाँच अर्ब ५० करोड ७१ लाख रुपैयाँ खुद ब्याजआम्दानी गरेको छ । त्यस्तै खुद फि तथा कमिशनबाट बैंकले ९९ करोड ६ लाख रुपैयाँ आर्जन गरेको छ ।
बैंकलाई उक्त अवधिमा तीन अर्ब ४२ करोड २७ लाख रुपैयाँ सञ्चालन मुनाफा भएको छ ।
गत आर्थिक वर्षको अन्त्यसम्ममा बैंकको वितरणयोग्य मुनाफा एक अर्ब ९३ करोड ७१ लाख रुपैयाँ रहेको छ । अघिल्लो वर्षको तुलनामा बैंकको वितरणयोग्य मुनाफा वृद्धि भए पनि लाभांश क्षमता घटेको छ । अघिल्लो वर्ष १०.४० प्रतिशत लाभांश क्षमता भएकोमा यो वर्ष बैंकको लाभांश क्षमता ८.९४ प्रतिशत मात्र रहेको छ ।
बैंकको खराब कर्जा २.८१ प्रतिशत कायम भएको छ । अघिल्लो वर्ष खराब कर्जा ०.८९ प्रतिशत थियो । बैंकको प्रतिशेयर आम्दानी १९ रुपैयाँ ४४ पैसा रहेको छ । प्रतिशेयर नेटवर्थ १७३ रुपैयाँ ५५ पैसा रहेको छ ।
बैंकको चुक्तापूँजी २१ अर्ब ६७ करोड दुई लाख ३८ हजार रुपैयाँ रहेको छ । बैंकले जगेडा कोषमा १४ अर्ब पाँच लाख रुपैयाँ सञ्चित गरेको छ ।
बैंकले असार मसान्तसम्म दुई खर्ब ९६ अर्ब २४ करोड रुपैयाँ निक्षेप संकलन गरेको छ भने दुई खर्ब ५३ अर्ब ६९ करोड रुपैयाँ कर्जा लगानी गरेको छ ।
