वाणिज्य बैंकहरूको नाफा करिब २५ प्रतिशतले बढ्यो, नबिलले सर्वाधिक नाफा गर्दा कुमारी कमजोर
काठमाडौं, २१ साउन । गत आर्थिक वर्ष २०७९/८० को अपरिष्कृत वित्तीय विवरण २० वटै वाणिज्य बैंकहरूले सार्वजनिक गरेका छन् । नेपाल राष्ट्र बैंकको निर्देशन अनुसार साउन २१ भित्र वाणिज्य बैंकहरूले आफ्नो चौथो त्रैमासिक वित्तीय विवरण सार्वजनिक गरेका हुन् ।
चौथो त्रैमाससम्मको अपरिष्कृत वित्तीय विवरण अनुसार २० वाणिज्य बैंकले ७० अर्ब १७ करोड ५८ लाख रुपैयाँ नाफा आर्जन गरेका छन् । अघिल्लो आर्थिक वर्षको तुलनामा २० वाणिज्य बैंकको नाफा औसत २४.९५ प्रतिशतले वृद्धि भएको हो ।
आर्थिक वर्ष २०७८÷७९ को अन्त्यसम्म यी बैंकहरूले ५६ अर्ब १७ करोड २३ लाख रुपैयाँ नाफा आर्जन गरेका थिए । २० वाणिज्य बैंकमध्ये १८ वटाले नाफा वृद्धि गेका छन् भने बाँकी कुमारी र प्राइम कमर्सियल बैंकको नाफा भने घटेको छ । कुमारी बैंकको नाफा २४.१४ प्रतिशतले घटेको छ भने प्राइम कमर्सियल बैंकको १८.८१ प्रतिशतले नाफा घटेको छ ।
गत वर्ष नबिल बैंकले सर्वाधिक नाफा कमाएर र वृद्धि गरेर पहिलो नम्बरमा परेको छ । यो बैंकले गत वर्ष सात अर्ब ५२ करोड ७१ लाख रुपैयाँ नफा आर्जन गरेको छ भने अघिल्लो वर्ष यो बैंकले चार अर्ब २५ करोड ६० लख रुपैयाँ आर्जन गरेको थियो । अघिल्लो वर्षको तुलनामा यो बैंकको नाफा ७६.८६ प्रतिशले वृद्धि भएको हो ।
त्यस्तै बढी नाफा गर्ने दोस्रोमा ग्लोबल आइएमई बैंक लिमिटेड रहेको छ । यो बैंकले पनि सात अर्ब २५ करोड ३४ लाख रुपैयाँ नाफा आर्जन गरेको छ । तर, अघिल्लो वर्षको तुलनामा यो बैंकको नाफा ४६ प्रतिशतले मात्र वृद्धि भएको छ ।
प्रतिशतको हिसाबमा सर्वाधिक नाफा वृद्धि गर्ने दोस्रोमा स्ट्याण्डर्ड चार्टर्ड बैंक रहेको छ । यो बैंकले ५६.२७ प्रतिशतले नाफा वृद्धि गरेको छ । गत वर्ष यो बैंकले तीन अर्ब ५२ करोड रुपैयाँ नाफा गरेको छ ।
तर, गत वर्ष २० वाणिज्य बैंकमध्ये सबैभन्दा कम नाफा माछापुछ्रे बैंकले आर्जन गरेपको छ ।
यो बैंकले एक अर्ब ८५ करोड ११ लाख रुपैयाँ नाफा आर्जन गरेको हो । गत वर्ष तीन अर्बभन्दा कम नाफा आर्जन गर्नेमा आठ वटा बैंक रहेका छन् । जसमा मर्जरपछि एकीकृत कारोबार गर्ने प्रभु, लक्ष्मी सन्राइज र कुमारी पनि परेका छन् ।
