प्रचण्डले भने–बैंकको ब्याजदर अहिले मैले भन्ने बित्तिकै घट्ने अवस्था छैन
काठमाडौं, २५ असोज। प्रधानमन्त्री पुष्पकमल दाहाल ‘प्रचण्ड’ले ब्याजदर घटाउने विषय आफ्नो नियन्त्रणमा नभएको बताएका छन् । नेपाल उद्योग वाणिज्य महासंघले बिहीबार आयोजना गरेको ‘राष्ट्रिय आर्थिक बहस’ कार्यक्रमलाई सम्बोधन गर्दै प्रधानमन्त्री प्रचण्डले आफूले भन्ने बित्तिकै ब्याजदर नघट्ने बताएका हुन् । यसका लागि सबैसँग छलफल गरेर सहमति जुटाउनु पर्ने उनको भनाइ छ ।
“बैंक ब्याजदर घटाउने विषय मैले भन्ने बित्तिकै हुने अवस्था छैन । अब रेडिकल रिफर्म गर्ने हो । अर्थतन्त्र सुधारका लागि उच्चस्तरीय आयोग बनाउछौं । त्यस्तो आयोगको नेतृत्व म आफैं गर्छ, त्यसले कानुनी आधार पनि पाउँछ र कार्यान्वयनमा पनि जान्छ,” प्रधानमन्त्री प्रचण्डले भने । अर्थतन्त्र सुधारको आफ्नो प्रयासमा निजी क्षेत्रले सहयोग गरिरहेको र अब सरकारले बोल्ड डिसिजन गर्ने पनि घोषणा गरे ।
“निजी क्षेत्रले प्रधानमन्त्रीलाई सजिलो गरिरहेको छ । पुरातन उपायबाट संकटको समाधान सम्भव छैन, अब गतिलो सुधार गर्नुपर्ने छ । अर्थतन्त्रको मूल समस्या समाधान भएको छैन । हामी ठूलो सुधारको तयारी गर्दै छौं । अर्थतन्त्र सुधारका लागि बोल्ड डिसिजन गर्दैछौं,” उनले भने ।
पछिल्लो समय नाफा कमाउनेहरुलाई गाली गर्ने क्रम बढेको बताउदै उनले अब सरकारले नै नाफा कमाउन प्रोत्साहन गर्ने बताए ।
