आन्तरिकतर्फ एक खर्ब २७ अर्ब राजस्व उठ्यो, विदेशिने विद्यर्थी बढ्दा लक्ष्यभन्दा बढी राजस्व संकलन
काठमाडौं, २० मंसिर । सरकारले कात्तिक मसान्तसम्म आन्तरिकतर्फ एक खर्ब २७ अर्ब १६ करोड रुपैयाँ राजस्व संकलन गरेको छ । आन्तरिक राजस्व विभागका अनुसार चार महिनाको अवधिमा लक्ष्यको १९.०५ प्रतिशत कम राजस्व संकलन भएको हो ।
विभागले आयकर, घरबाहल कर, शिक्षा कर, स्वास्थ्य सेवा कर, मूल्य अभिवृद्धि कर (भ्याट)लगायत शीर्षकमार्फत एक खर्ब ५७ अर्ब नौ करोड ४० लाख रुपैयाँ राजस्व संकलन गर्ने लक्ष्य राखेको थियो । तर, विभागले राखेको लक्ष्यको ८०.९५ प्रतिशत कर प्राप्त भएको हो ।
चार महिनाको अवधिमा सबैभन्दा बढी आयकरमार्फत उठको छ । यो शीर्षकमा ४३ अर्ब १८ करोड रुपैयाँ राजस्व उठेको छ । यो लक्ष्यको ९४.८७ प्रतिशत हो ।
लक्ष्यभन्दा बढी कर शिक्षा मार्फत उठेको छ । कात्तिकसम्म विभागले शिक्षा शीर्षकमा ८५ करोड ५६ लाख रुपैयाँ कर आर्जन गर्ने लक्ष्य राखेको थियो । तर, यो शीर्षकमा एक अर्ब २१ करोड एक लाख रुपैयाँ आर्जन भएको छ । यो लक्ष्यको १४१.४३ प्रतिशत हो ।
सबैभन्दा कम घरबहाल करमार्फत उठेको छ । यो शीर्षकमा ९९ करोड ५१ लाख रुपैयाँ कर उठाउने लक्ष्य राखिएको भए पनि ५७ करोड ९९ लाख रुपैयाँ राजस्व संकलन भएको विभागले जनाएको छ । यो लक्ष्यको ५८.२८ प्रतिशत हो ।
पछिल्लो समय विदेश पढ्न जाने विद्यार्थीहरूको संख्या बढ्दै गएपछि शिक्षा शीर्षकमा आर्जन गर्ने भनिएको करमा व्यापक वृद्धि भएको देखिन्छ । नेपालमा भने अहिले कलेज पढ्ने विद्यार्थीको संख्या न्यून हुँदै गएको छ ।
