सात महिनामा सरकारको आम्दानी ४४.८३ प्रतिशत र खर्च ४०.५८ प्रतिशत, १६ प्रतिशतमा खुम्चियो वैदेशिक अनुदान
काठमाडाैं, ३ फागुन । चालु आर्थिक वर्षको ७ महिनामा सरकारको आम्दानी र खर्च दुवै कमजोर देखिएको छ ।
चालु आर्थिक वर्ष २०८१/८२ को माघ मसान्तसम्ममा चालुतर्फ ५ खर्ब २२ अर्ब ६२ कराेड ५३ लाख अर्थात लक्ष्यकाे ४५.८२ प्रतिशत खर्च भएको छ । यस्तै पुँजीगत शीर्षकमा ६८ अर्ब ४१ करोड ५९ लाख अर्थात १९.४२ र वित्तिय व्यवस्थापन तर्फ लक्ष्यकाे ४४.६ प्रतिशत अर्थात १ खर्ब ६३ अर्ब ८१ कराेड २२ लाख खर्च भएको छ ।
चालु आर्थिक वर्षका लागि सरकारले चालुगत शीर्षकमा ११ खर्ब ४० अर्ब ६६ करोड ४५ लाख, पुँजीगत शीर्षकमा तीन खर्ब ५२ अर्ब ३५ करोड ४० लाख र वित्तिय व्यवस्थापन तर्फ तीन खर्ब ६७ अर्ब २८ करोड ४५ लाख रुपैयाँ बजेट विनियोजन गरेको थियो ।
यस्तै चालु आर्थिक वर्षमा सरकारले १४ खर्ब ७१ अर्ब ६२ करोड ९५ लाख रुपैयाँ बराबर राजस्व उठाउने लक्ष्य राखेकोमा माघ मसान्तसम्म ६ खर्ब ५९ अर्ब ७३ करोड ५७ लाख रुपैयाँ राजस्व असुली गरेको छ । जुन वार्षिक लक्षयकाे ४४.८३ प्रतिशत मात्र हाे ।
यस अवधिमा कर राजस्वतर्फ पाँच खर्ब ६५ अर्ब ६४ करोड ३६ लाख, गैरकरतर्फ लक्ष्यको ५७.१५ प्रतिशत अर्थात् ७७ अर्ब २१ करोड तीन लाख रूपैयाँ अशुली भएको छ
सरकारले चालु आर्थिक वर्षका लागि १८ खर्ब ६० अर्ब ३० करोड ३० लाख रुपैयाँ बराबरको बजेट ल्याएकोमा आयव्यय दुवै कमजोर भएपछि अर्धवार्षिक समीक्षामार्फत शुरूआती विनियोजनको तुलनामा ९०.९९ प्रतिशत मात्रै बजेट खर्च गर्ने संशोधित अनुमान गरेको छ।
यता चालु आर्थिक वर्षका लागि ५२ अर्ब ३२ करोड ६५ लाख रुपैयाँ बराबर वैदेशिक अनुदान लिने लक्ष्य राखेको सरकारले ७ महिनामा वार्षिक लक्ष्यको १६.८७ प्रतिशत अर्थात ८ अर्ब ८२ करोड ६० लाख रुपैयाँ मात्रै उठाएको छ।
