सिराहा भन्सार कार्यालयले १४४ सवारी साधन लिलाममा बिक्री गर्ने
काठमाडाैं, २३ फागुन । सिराहा भन्सार कार्यालयले भन्सार छली, चोरी, निकासी र पैठारी अभियोगमा दाखिल भएका १४४ वटा सवारी साधनहरू लिलाम बिक्री गर्न लागेको छ। यसरी बिक्री हुने सवारी साधनमध्ये ११८ वटा मोटरसाइकल र २६ वटा तीनपाङ्ग्रे तथा चारपाङ्ग्रे सवारी साधन रहेका छन्।
लिलाम बिक्री हुने मोटरसाइकलहरूको न्यूनतम मूल्य ९ हजार ३३४ रुपैयाँदेखि ५ लाख ५ हजार २७३ रुपैयाँसम्म तोकिएको छ। यसअनुसार, २०१८ मोडलको बजाज प्लाटिना १५९.७ सीसी मोटरसाइकलको मूल्य सबैभन्दा कम र २०१८ मोडलको सुजुकी जीपको मूल्य सबैभन्दा बढी निर्धारण गरिएको छ।
भन्सार कार्यालयले यसअतिरिक्त ३३९ थान मोटरसाइकल र २६ थान कार यातायात व्यवस्था कार्यालयमा दर्ता नभएका कारण कवाडीमा लिलाम गर्ने निर्णय गरेको छ। यी मोटरसाइकलहरूको न्यूनतम मूल्य १६ लाख ९५ हजार रुपैयाँ र कारहरूको न्यूनतम मूल्य ८ लाख ८९ हजार ५२५ रुपैयाँ तोकिएको छ।
बोलपत्र प्रक्रियामा सहभागी हुन २१ दिनको समय दिइएको छ भने २२ औं दिन १२ बजे प्रस्ताव खोलिने जनाइएको छ। बोलपत्रमा सहभागी हुन एक हजार रुपैयाँ बोलपत्र दस्तुरसहित आवेदन दिनुपर्ने कार्यालयले जनाएको छ।
