मौलाकालीमा इला होटलको उद्घाटन, अध्यक्ष ढकालले गरे पर्यटन पूर्वाधारमा थप लगानीको आह्वान
नवलपुर, २९ वैशाख । आइएमई हस्पिटालिटीले नवलपुरको मौलाकालीमा नवनिर्मित इला होटल आजदेखि औपचारिक रुपमा सञ्चालनमा ल्याएको छ । संस्कृति, पर्यटन तथा नागरिक उड्डयनमन्त्री बद्री पाण्डेले होटलको उद्घाटन गरेका हृुन् ।
होटलको समुद्घाटन समारोहमा आइएमई ग्रुपका अध्यक्ष चन्द्रप्रसाद ढकालले मुलुकको विकास र समृद्धिको प्रमुख आधार पर्यटन भएको बताउँदै पर्यटन पूर्वाधारको विकासमा जोड दिएका छन् ।
उनले आइएमई हस्पिटालिटीले यस होटलसँगै पाँचवटा होटल तथा रिसोर्ट सञ्चालनमा ल्याइसकेको जानकारी दिए । यसअघि बागलुङमा इला होटलको उद्घाटन भएको थियो भने काठमाडौँको चन्द्रागिरिमा चन्द्रागिरि रिसोर्ट, लाजिम्पाटमा होटलले हिमालय र पोखराको लेकसाइटमा लेक साइट रिट्रिट सञ्चालन भइरहेको उनले बताए ।
अध्यक्ष ढकालले मुलुकका सातवटै प्रदेशमा केवलकारसहितका होटल तथा रिसोर्ट निर्माण गर्ने योजना रहेको जानकारी दिँदै हालसम्म तीनवटा प्रदेशमा केवलकार निर्माण भई सञ्चालनमा आइसकेको बताए । लुम्बिनी केवलकारको टप स्टेसन बसन्तपुरमा होटल निर्माण प्रक्रिया अघि बढेको र सुदूरपश्चिमको कैलालीमा होटल, रिसोर्ट र केवलकार निर्माणको काम एकसाथ अघि बढिरहेको उनको भनाइ थियो ।
कैलालीमा अबको एक वर्षभित्र केवलकार सञ्चालनमा आउने र त्यसपछि होटल तथा रिसोर्ट पनि सञ्चालनमा आउने उनले बताए । ताप्लेजुङको पाथीभरामा पनि केवलकार निर्माणको काम भइरहेको जानकारी उनले दिए ।
पर्यटन पूर्वाधारको कमीका कारण नेपाल आउने विदेशी पर्यटकको औषत खर्च र बसाई कम भएको तथ्याङ्क प्रस्तुत गर्दै अध्यक्ष ढकालले पर्यटकलाई आकर्षित गर्ने र उनीहरुको बसाई तथा खर्च बढाउने खालका थप ठूला पूर्वाधारहरु निर्माण गर्नुपर्नेमा जोड दिए । नेपालको संस्कृति, कला, प्राकृतिक सौन्दर्य र विशिष्ट भूगोल नै पर्यटकको आकर्षणको केन्द्र भएकोले त्यस्ता पर्यटकीय पूर्वाधारको विकासमा सरकारले निजी क्षेत्रलाई सहजीकरण गर्नुपर्ने उनको सुझाव थियो ।
सरकारले निजी क्षेत्रसँग साझेदारीको नीति लिए देशको विकास छिटो हुनेमा उनले विश्वास व्यक्त गरे ।
उनले नेपालमा अथाह प्राकृतिक सम्पदा रहेको र पर्यटन, प्रकृति तथा पर्यावरणका क्षेत्रमा धेरै सम्भावनाहरु रहेको बताए । भिजन, इच्छाशक्ति, प्रविधि र पुँजीको संयोजनबाट पर्यटन क्षेत्रमा चमत्कार गर्न सकिने उनको धारणा थियो ।
अध्यक्ष ढकालले उपयुक्त वातावरण पाए निजी क्षेत्रले ठूलो लगानी गर्न सक्ने र विकास, रोजगारी तथा आर्थिक वृद्धिमा सरकारलाई सहयोग गर्न सक्ने बताए । स्थानीय तहहरुले लगानीकर्तालाई आकर्षित गर्न प्रतिस्पर्धा गर्नुपर्ने र ठोस नीति मार्फत सहजीकरण गर्नुपर्नेमा उनले जोड दिए । पर्यटन पूर्वाधारमा लगानी गरेर पर्यटकको बसाई लम्ब्याउन, विदेशी मुद्रा आर्जन गर्न, रोजगारी सिर्जना गर्न र राजस्व बढाउन सकिने उनको भनाइ थियो ।
चितवन, तनहुँ र नवलपुरको संगम धार्मिक तथा सांस्कृतिक महत्वको क्षेत्र भएको उल्लेख गर्दै उनले मौलाकालिका मन्दिरको ऐतिहासिक महत्व र यस क्षेत्रका अन्य धार्मिक स्थलहरुको महिमालाई पर्यटन पूर्वाधारले सबै नेपाली समक्ष पुर्याउन मद्दत गर्ने विश्वास व्यक्त गरे ।
प्राकृतिक सौन्दर्यलाई कायम राख्दै स्थानीय नागरिकको जीवनस्तर उकास्ने र पर्यटन विकासमार्फत देशको समृद्धि हासिल गर्ने प्रतिबद्धता उनले व्यक्त गरे । नवलपुरको गहनाको रुपमा निर्मित इला होटललाई स्थानीय जनताको सम्पत्तिको रुपमा विकास गर्ने मोडल अघि सारिएको र उनीहरुको अधिकतम सहभागिता गराइने उनले बताए ।
कार्यक्रममा अध्यक्ष ढकालले होटल निर्माणमा सहयोग गर्ने संघ, प्रदेश तथा स्थानीय सरकार, राजनीतिक दल, स्थानीयवासी, मन्दिर व्यवस्थापन समिति, वन उपभोक्ता समिति लगायत सबै सरोकारवालाहरुलाई धन्यवाद ज्ञापन गरे । गण्डकी प्रदेशको बासिन्दा भएको नाताले आफ्नो जन्मभूमिमा यस प्रकारको सेवा गर्न पाउँदा आफूलाई खुशी लागेको उनले बताए ।
अन्तमा उनले ‘जहाँ ढुंगा ढुंगामा देवताको बास छ’ भन्ने नेपाली गीतलाई स्मरण गर्दै हरेक डाँडामा पर्यटनको सम्भावना रहेको र त्यहाँ पूर्वाधार विकास गर्नुपर्नेमा जोड दिए ।
समुद्घाटन कार्यक्रममा माननीय मन्त्रीलगायत विभिन्न अतिथिहरुको उपस्थिति रहेको थियो ।
