एडीबी उपाध्यक्ष फातिमा यासमिनको नेपाल भ्रमण, दिगो पूर्वाधार र क्षेत्रीय सहयोगमा प्रतिबद्धता दोहोर्याइन्

काठमाडाैं, २ जेष्ठ । एसियाली विकास बैंक (ADB) का क्षेत्र र विषयका लागि उपाध्यक्ष फातिमा यासमिनले आफ्नो दुईदिने नेपाल भ्रमण सम्पन्न गरेकी छन्। भ्रमणका क्रममा उनले दक्षिण एसियामा जलवायु सहनशीलता, दिगो विकास र क्षेत्रीय सहयोगप्रतिको एडीबीको बलियो प्रतिबद्धता दोहोर्याइन्।

उपाध्यक्ष यासमिन नेपालमा सगरमाथा संवादमा सहभागी हुन आएकी थिइन्। यो उच्चस्तरीय संवाद कार्यक्रमले विश्व, क्षेत्रीय र राष्ट्रिय मुद्दाहरूमा केन्द्रित हुँदै जलवायु परिवर्तन, दिगोपन र सहनशीलतामा छलफल गरेको थियो। उक्त कार्यक्रममा विश्व नेताहरू, विकास साझेदारहरू, वैज्ञानिकहरू र नागरिक समाजका प्रतिनिधिहरूले पर्वतीय सहनशीलताका समाधानहरूमा आफ्ना धारणा राखेका थिए।

“सगरमाथा संवादको आयोजना गर्दै नेपालले विश्वसमक्ष बलियो सन्देश दिएको छ,” उपाध्यक्ष यासमिनले भनिन्। “हिमताल विस्फोट, पहिरो र बाढी जस्ता विपत्तिहरूले जनजीवन, जीविकोपार्जन र दशकौंको विकासलाई जोखिममा पारेका छन्। सहनशील पूर्वाधार र क्षेत्रीय सहयोगमा लगानी गर्न अहिलेको समय उपयुक्त हो। एडीबी नेपाल र यस क्षेत्रलाई सुरक्षित, दिगो भविष्य निर्माणमा सहयोग गर्न तयार छ।”

यस भ्रमणका क्रममा उपाध्यक्ष यासमिनले उपप्रधानमन्त्री तथा शहरी विकास मन्त्री प्रकाशमान सिंह र ऊर्जा, जलस्रोत तथा सिँचाइ मन्त्री दीपक खड्कासँग भेटवार्ता गरिन्। भेटमा नेपालको दीर्घकालीन विकास लक्ष्यलाई सहयोग पुर्याउन जलवायु-सहनशील पूर्वाधार र शहरी योजनाका रणनीतिहरू अघि बढाउने विषयमा छलफल भयो।

यासमिनले एडीबीको बागमती नदी बेसिन सुधार परियोजनाअन्तर्गत पुनर्निर्मित तीन देवल सम्पदा क्षेत्रको भ्रमण पनि गरिन्। साथै, काठमाडौं उपत्यकामा चलिरहेका र योजना गरिएका जलसम्बन्धी लगानीहरू जस्तै फोहोर पानी प्रशोधन, नदी पुनःस्थापना तथा दिगो शहरी विकासका पहलहरूबारे जानकारी लिइन्।

एसियाली विकास बैंक (ADB) एसिया तथा प्रशान्त क्षेत्रमा समावेशी, सहनशील र दिगो विकासलाई प्रवर्द्धन गर्दै आएको प्रमुख बहुपक्षीय विकास बैंक हो। यसले आफ्ना सदस्यहरू र साझेदारहरूसँग मिलेर जटिल चुनौतीहरूको समाधान गर्दै आर्थिक उन्नति, गुणस्तरीय पूर्वाधार निर्माण र वातावरण संरक्षणमा योगदान पुर्याइरहेको छ। सन् १९६६ मा स्थापना भएको एडीबीमा ६९ सदस्य राष्ट्र छन्, जसमा ५० राष्ट्र एसिया तथा प्रशान्त क्षेत्रका छन्।