त्रिभुवन विश्वविद्यालयको ६३औं दीक्षान्त सूची पारित, ८९ हजार बढी विद्यार्थी दीक्षित हुने
काठमाडाैं, २६ असार । त्रिभुवन विश्वविद्यालयको वार्षिक साधारण सभाले आफ्नो ६३औं दीक्षान्त सूची पारित गरेको छ। यस सूचीमा विभिन्न संकाय र तहमा उत्तीर्ण भएका ८९ हजार १९१ विद्यार्थीहरू समावेश छन्।
प्रधानमन्त्री तथा विश्वविद्यालयका कुलपति केपी शर्मा ओलीको अध्यक्षतामा प्रधानमन्त्रीको निवास बालुवाटारमा सम्पन्न बैठकले रजिस्ट्रार डा. केदारप्रसाद रिजालले प्रस्तुत गर्नुभएको दीक्षान्त सूची पारित गरेको हो।
साधारण सभाले आर्थिक वर्ष २०८२/८३ को बजेट र कार्यक्रमको पनि समीक्षा गरेको छ। कुलपति ओलीले विश्वविद्यालयलाई २१औं शताब्दीका लागि उपयुक्त, प्रतिस्पर्धी र सक्षम संस्थाको रूपमा स्थापित गर्न आग्रह गरे।
सहकुलपति तथा शिक्षा, विज्ञान तथा प्रविधि मन्त्री रघुजी पन्तले “समृद्ध नेपाल, सुखी नेपाली” को राष्ट्रिय आकांक्षा पूरा गर्न विश्वविद्यालयको महत्वपूर्ण भूमिका रहेकोमा जोड दिँदै यस लक्ष्यसँग तालमेल मिलाउन आग्रह गरे।
हालै नियुक्त हुनुभएका उपकुलपति दीपक अर्यालले विश्वविद्यालयले कुल विद्यार्थी संख्याको कम्तीमा १ प्रतिशत अर्थात् करिब ४,००० विद्यार्थी अन्तर्राष्ट्रिय विद्यार्थी हुनुपर्ने लक्ष्य राख्नुपर्ने बताए।
