स्वास्थ्य मन्त्री पौडेलको पहलमा क्यान्सरका दुर्लभ औषधि निःशुल्क उपलब्ध: अब विदेश जानु नपर्ने
काठमाडाैं, २९ असार । स्वास्थ्य तथा जनसंख्या मन्त्री प्रदीप पौडेलले क्यान्सरका बिरामीलाई अब दुर्लभ र महँगो औषधिहरू निःशुल्क उपलब्ध गराउने निर्णय गरेका छन्। यस पहलको मुख्य उद्देश्य विपन्न नागरिकलाई क्यान्सरको उपचारमा सहजता पुर्याउनु हो, जसका लागि नेपालमा उपलब्ध नभएका औषधिहरू विदेश जानु पर्ने समस्यालाई कम गर्ने प्रयास गरिएको छ।
मन्त्री पौडेलको विशेष पहलमा अन्तर्राष्ट्रिय च्यारिटी संगठन ‘डाइरेक्ट रिलिफ’ले ३७ प्रकारका क्यान्सर उपचारमा प्रयोग हुने दुर्लभ औषधिहरू नेपाल पठाउने प्रतिबद्धता जनाएको थियो। यी औषधिहरू पहिलो खेपमा नेपाल आइपुगेको छ र सरकारले सरकारी अस्पतालहरूमा निःशुल्क उपलब्ध गराउने व्यवस्था मिलाएको छ।
आइतबार आयोजित एक कार्यक्रममा बोल्दै, मन्त्री पौडेलले औषधिको अभावमा विदेश जानु पर्ने समस्याबाट जोगिन लामो समयको मेहनतपछि यो सफलता प्राप्त भएको बताए। उनले भने, “क्यान्सरको उपचार महँगो र दुर्लभ औषधिहरूका कारण धेरै बिरामीलाई समस्या पर्दै आएको छ। हामीले राज्यको लगानी बिना नै नागरिकलाई राहत दिनको लागि यो व्यवस्था गरेका हौं।”
साथै, मन्त्री पौडेलले यस्ता औषधिहरू ५ वर्षसम्म नेपालमा आवश्यकताअनुसार प्राप्त हुने जानकारी पनि दिएका छन्। डाइरेक्ट रिलिफले पठाएका औषधिहरू विशेष रूपमा स्तन क्यान्सर, छाला क्यान्सर लगायतका विभिन्न क्यान्सरका उपचारमा प्रयोग हुनेछन्।
अर्को महत्वपूर्ण पक्ष भनेको स्वास्थ्य मन्त्रालयले सरकारी क्यान्सर अस्पतालहरूमा यी औषधिहरू तुरुन्त उपलब्ध गराउनको लागि व्यवस्था मिलाएको छ। मन्त्रालयका प्रवक्ता डा. प्रकाश बुढाथोकीले भने, “यी औषधिहरू बीपी कोइराला मेमोरियल क्यान्सर अस्पताल, भरतपुर क्यान्सर अस्पताल, भक्तपुर क्यान्सर अस्पताल, शुशिल कोइराला प्रखर क्यान्सर अस्पताल र वीर अस्पतालमा निःशुल्क उपलब्ध गराइनेछ।”
मन्त्री पौडेलले सरकारी स्वास्थ्य सेवा र बीमासम्बन्धी जानकारीको अभावका कारण नागरिकले सेवा लिन नसकेको समस्यालाई पनि उठाए। उनले सञ्चारमाध्यमलाई यसबारे जानकारी दिने कामलाई प्राथमिकतामा राख्न आग्रह गरेका छन्।
सम्पूर्ण स्वास्थ्य सेवा प्रणालीमा सुधार ल्याउन र विपन्न वर्गलाई क्यान्सर उपचारमा मद्दत पुर्याउन मन्त्रालयको यो कदम निकै महत्वपूर्ण मानिएको छ।
