राष्ट्र बैंकले आज २५ अर्ब तान्दै
काठमाडाैं, २२ भदाै । नेपाल राष्ट्र बैंकले आइतबार बैंकिङ प्रणालीबाट थप तरलता व्यवस्थापन गर्ने भएको छ । यसअन्तर्गत केन्द्रीय बैंकले आज २५ अर्ब रुपैयाँ निक्षेप संकलन गर्ने तयारी गरेको हो ।
राष्ट्र बैंकले भदौ २२ गते मध्यान्ह ३ बजे बोलकबोलमार्फत सो बराबरको रकम २१ दिनका लागि संकलन गर्नेछ । यसकाे सावाँ तथा ब्याज भुक्तानी आगामी असोज १२ गते तोकिएको छ । ब्याजदर बोलकबोलको आधारमै निर्धारण हुनेछ ।
बोल गर्न सकिने रकम न्यूनतम १० करोड रुपैयाँ तोकिएको छ भने अधिकतम सीमा भने पाँच करोड रुपैयाँले भाग गर्दा आउने निस्शेष भागसम्म कायम रहनेछ ।
निक्षेप संकलन उपकरणमा ‘क’, ‘ख’ र ‘ग’ वर्गका बैंक तथा वित्तीय संस्थामात्र सहभागी हुन पाउने व्यवस्था गरिएको राष्ट्र बैंकले जनाएको छ । यसबाहेक बहुब्याजदर प्रणालीमा बहुबोलकबोल गर्न सकिने समेत जानकारी दिइएको छ ।
